– «Елім-ай» қоғамдық қорының жұмыс жүргізіп отырғанына келесі жылы – 10 жыл. Бастапқы кезеңдері біраз қиындық болғаны рас. Оған Үкіметімізде орын алған сан түрлі экономикалық қиындықтар да себеп болды. Яғни, мемлекет тарапынан берілетін гранттар жоқтың қасы еді. Соңғы 3 жылда Мемлекетіміз бізді қамқорлығына алды. Тарылған тынысымызды кеңейтті. Бұл да Егемендігіміздің беріктігінің айғағы екені айқын. Биыл Елбасының тілімен айтсақ, «2015 жыл – ұлттық тарихымызды ұлықтау және бүгінгі биіктерімізді бағалау тұрғысынан мерейлі белестер жылы». Міне, осындай тарихи жылды ұмытылмастай өткізу мақсатында жыл басында аудан әкімі Бинәлі Ысқақ аудан айнасы «Еңбекшіқазақ» газетіне берген сұхбатында: «Қазақ хандығын қазақ үй тігіп, қазан көтеріп, көкпар тартып тойлаудың қажеті шамалы. Оның астары – тарихымызға талдау жасау, арғы тегімізді түгендеу. Әр округ ең бірінші өз ауылының тарихына көз жүгіртсін. Зерттесін, зерделесін, ақтаңдақтарын ақтарсын. Себебі, өз ауылының тарихын танымаған адамнан елдің тарихын қалай сұрамақсың» деген еді. Міне, осы тапсырма аясында «Елім-ай» қоғамдық қоры арнайы жоба қорғады. Аудандық ішкі саясат бөлімінің қолдауымен әр округте танымдық дөңгелек үстелдер өткізу, тарихи жылдың мән-маңызын түсіндіру, ұлттық болмысымызды ұлықтау тұрғысынан түрлі конференция-фестивальдер ұйымдастыру секілді жұмыстарды жүйелі жүргіздік. Нақты атап өтсем, биылғы атаулы мерекелерге орай, «Қазақ хандығы: Өрелі ел болу – өзімізден» тақырыбында әр округте дөңгелек үстелдер, «Алтын Ордадан – Ақ Ордаға дейін...», «Біз бірлікті қолдаймыз», «Бейбіт күн жасасын әлемде!»,  «Қадірін ата заңның білемісің?», «Ардың шыңы – Ата заң», «Біргеміз, берік іргеміз», «Қаруын қаламға айырбастап», «Ол күндер мәңгі есте сақталады» секілді тақырыптарда акциялар өткіздік. Ұлттық салт-дәстүрімізді жаңғырту мақсатында Тайқазанды қабылдап алдық. Тұңғыш рет «Адам және қоғам» қоғамдық қорымен бірлесе отырып, 1000-нан астам аудан тұрғындарының қатысуымен 150 шақырымды бағындырып, 7 ауылды басып өткен биылғы атаулы мерекелерге орай автошеру ұйымдастырдық. «20 игі іс» жобасы аясында 120-дан астам әлеуметтік аз қамтылған отбасыларға көмек көрсеттік. «Мектепке жол» акциясы аясында да 30 балаға қамқорлық таныттық. Одан да өзге ардагерлерімізге барып, жағдайын біліп, аз-кем дастарханына дәм-тұзын ұсынуды да назардан тыс қалдырмадық. Сондай-ақ, «Ұлы Дала төсіндегі – Мәңгілік Ел» тақырыбында аудандық суретшілер байқауының да жоғарғы дәрежеде өтуіне ұйытқы боп отырмыз. Мұндай игі іс-шаралардың бәрі де Қазақ хандығының 550 жылдығына, Ұлы Жеңістің 70 жылдығына, Қазақстан халқы Ассамблеясының және Конституциямыздың 20 жылдығына арналып отыр. Жалпы айтқанда, қоғамдық қордың тікелей ұйымдастыруымен биылғы атаулы мерекелерге орай 100-ге жуық түрлі іс-шаралар түндігі түрілді, – деді. Сондай-ақ, атқарған толағай жұмыстарының суреттері слайд арқылы көпшілікке ұсынылды.

Сөз алған Хайролла Ахметжанов және Момунжан Исламов «Елім-ай» қоғамдық қорының 8 айда атқарған жұмыстарына оң бағаларын беріп, алдағы жұмыстарына сәттілік тіледі. 

Қайнар ЖҰМАҒОЖА.