Ақындар қай ғасырда да адамзат үшін керек тұлғалар қатарында. Еркелігін, ерлігін аңыз етіп айта жүрер ақындар бүгінгі қоғам үшін де ауадай қажет. Ар-намыс, махаббат, адалдық, мейірім, иман, батырлық сынды игі қасиеттерді үнемі дәріптеу үшін. Ал, ақын жоғалған қоғамда әділет пен әсемдік, нәзіктік пен пәктік жоғалатынын есекергейсіздер ,оқырман.

Шаяхмет Құсайынов осындай «от ауызды, орақ тілді», «жақсыны жақтап, жаманды даттап», «нарды нар, барды бар» дейтін ақынымыз. «Қазақ болып туғаныма мақтанам» – деп, әркімнің аузынан шыға бермейтін шындықты жырлап шырылдаған ақын. Тілі мен діні, салты мен дәстүрі жолында  құйрықты жұлдыздай құйғытып отқа сүңгіп опат болуға бар. Ол өлең оқығанда желке жүні күдірейіп арыс-тандай ақырып тұрады. Немесе арлан қасқыр азу тісін ақситып дәл қазір тап бергелі тұрғандай күй кешесің. Бұл өз денесіндегі өршіл рух, қайыспас қайсарлығы болса керек Шаяхмет ақынның. 

Аудандық мәслихат хатшысы Әділбай Талқамбаев та ақынның осы қасиеттерін айшықтай келе: «Қазақ халқының тарихына үңілсек, ханның бетіне шындықты тек қана ақындар айтып, қоғамның әділеттілігі жолында басын тігіп отырған. От кеуделі Махамбет ақын Жәңгір ханға не деді? Бұқар жырау Абылай ханға тек шындықты айтып қана қомай, ақылшысы да болды. Елдің ел болуы жолында Бұқар жыраудың өршіл жырлары қазақ батырларына қайсарлық дарытса, олар ел шетіне тиген қанды көз жауды қан қақсатып қайтарып тастап отырды. Осылай орта ғасырларда ақын – ақын ғана емес, қоғам қайраткеріне айналды. Ал қазір бұл мәртебе тіпті орасан жүк артады ақынға. Әділеттілік, имандылық, адамгершілік және т.б құндылықтарды дәріптеу, адамзатты адастырмау. Сондай-ақ, ақын бұл іске тікелей жауапты тұлға. Жаратушы Алла ақыннан бұл үшін жауапты тікелей өзі алады деген тәмсіл де бар ел ішінде» – деді. Сондай-ақ, ақынды сахна төріне шақырып, иығына шапан жапты, сый-сияпатын ұсынды.

Ақын, жазушы Шаяхмет Құсайынов турасында «Zaman Қазақстан» газетінің бас редакторы Ертай Айғалиұлы да толғана әңгімеледі. «Ақын тағдыры алмағайып тағдыр. Күлпара атты жарымен бірге бір ұл, үш қызды дүние жарығына әкелді. Алайда жары Күлпара ауыр науқастан өмірден өтті. Осы кезде ақын бір ұлы, үш қызын өзі тәрбиелеп, ел қатарына қосты. Бұл ерен ерлік. Жалғыздық жаратушыға ғана жарасқан. Бүгінгі жары да ақынның нәзік жанын түсіне білді. Шабытын еселеді. Бұл күнде екеуі бүлдіршін қыздарының қылығына сүйсінуде. Өршіл өлеңдері оқырманға тура жол сілтеп, жүректерге от, көңілдерге нұр сыйлауда» – деді. Жазушылар Одағының мүшесі Шаяхмет Құсайыновтың прозалық шығармала-ры өз алдына өнер шыңы. Шым-шытырық көркем суреттелген оқиғалар оқырманды бірден баурап, ой тұңғиғына сүңгітіп жіберетінін тілге тиек етті Ертай Айғалиұлы.

Сондай-ақ, аудандық Ішкі Істер басқармасы ардагерлер кеңесінің төрағасы Тілеуқазы Жақыпов ақынның Ішкі істер басқармасында қызмет еткен жылдарынан әсерлі естеліктер айтты. Мұнда да қоғам тыныштығы мен қауіпсіздігін қамтамасыз ете жүріп, қолынан қаламын түсірмеген. Қалт еткен оқиғаны қағаз бетіне түсіре жүріп, әділдік, қылмыс тақырыптарындағы талай шағырмалары дүниеге келді.

Колледж директоры Гүлнәр Жошыбаева, «Қазселденқорғау» ММ Есік аймақтық пайдалану басқармасының басшысы Еркін Нұрмұханбетов және т.б кеш қонақтары ақын турасында әсерлі әңгімелер айтып, естеліктерімен бөлісті. Ал, ақын     Шаяхмет сиясы кеппеген жаңа туындыларын ұсынды. Онда өршіл рух, ар-намыс ұшқыны тағы да жарқылдап жатты.

Ә.МАНАСБЕК.