Олимпиаданың өту барысымен таныстырған лицей директоры Тамер Гюрдің (суретте) айтуынша, пән жарысына 36 оқушы қатысқан. Соның 29-ы жеңімпаз атанып,  11 алтын, 12 күміс, 6 қола медальмен қанжығалары майланып, керемет көрсеткішке қол жеткізген.

«Облыс бойынша мектебіміз де, 19 ауданның ішінен дараланған біздің Еңбекшіқазақ ауданы да командалық есеп бойынша 1-ші орынды алды. Олимпиада екі күнге созылды. Бірінші күні теориялық тур болса, екінші күні практикалық турда бақ сынасты. Оқушыларымыз екі турдан да сүрінбей өтті. Химия пәнінен 10 сынып оқушысы Нұргелді Санабай екі турдан да 100 пайыз жауап беріп, ең жоғары нәтиже көрсетті. Ең жоғары абсолютті бірінші мен екінші орын алған 12 оқушымыз республикалық олимпиадаға жолдама алып, қазір дайындық үстінде. Жаратылыстану пәндері бойынша республикалық олимпиада биыл Көкшетау қаласында, наурыз айында болады деп күтілуде. Осы тұста тағы бір айта кетерлігі, информатика пәнінен 3 оқушы, химия пәнінен  4 оқушы республикалық олимпиаданың құрама командасының ішіне кірді. Енді республикадан жүлделі орын алатын болса, дүниежүзілік олимпиадаға жол ашық деген сөз. Оқушыларымыздан үлкен үміт күтіп отырмыз. Мақсаттарына жету жолында сәттілік тілейміз» деген қуанышты да маңызды ақпаратты жеткізді А.Мәлкеев атындағы қазақ-түрік лицейінің директоры Тамер Гюр.

Шәкірттерінің әрбір жеңісіне масаттана марқаятын ұстаздарды айтпай кету сын болар. 10 оқушыны баптап, бастап барған химия пәнінің мұғалімі Ерболат Аблеметов өзі жас маман болғанымен, дайындаған оқушыларының бәрі де жүлдегер атанып, мерейін тасытты. Информатика пәнінің мұғалімі Мақсат Төлегенов те жас мамандар қатарынан. Олимпиадаға 9 оқушы апарып, бәрі де жүлделі орынды алды. География пәнінің мұғалімі Тамара Есжанова 4 оқушы апарып, төртеуі де жүлделі оралған. Биология пәнінің мұғалімі Арман Шанинов 2 оқушы қатыстырып, олар да біреуі алтын, біреуі күміспен оралды. Сонымен қатар, қазақ тілі, ағылшын тілі, Қазақстан тарихы, математика пәндерінен де оқушылар сынға түсіп, жүлдегер атанды.

Химия пәнінен додаға түсіп, алтын медаль жеңіп алған 11 сынып оқушысы Айбол Қажымұратов: «Мен үшін облыстық олимпиада баспалдақ іспеттес. Республикаға өту жолындағы бір саты. Биыл бесінші мәрте қатысып отырмын. Болашақта таңдаған мамандығым осы пәнмен байланысты болғандықтан, маған әрбір сын, сынақ қызық. Одан абыроймен өту – менің басты мақсатым» дейді. Ал, биология пәнінен сынға түсіп, алтын медальды мойнына таққан 10 сынып оқушысы Илхамжан Мансуров «Сен үшін ең қиыны не болды?» деген сұраққа сәл ғана жымиыспен: «Мен үшін ең қиыны – олимпиаданың нәтижесін күту болды. Біздің пән биология болғандықтан, зерттеу, сынағымен бірге оны тексеру өте ұзаққа созылады. Сол көп уақытты алады. Дегенмен, бәсекелестік жоғары» деген пікірімен бөлісті.

«Білімді мыңды жығатынын» білетін білімділер заманының  жастарына тек сәттілік тілейміз. Алда күтер жеңісті күндерің көп болғай!

Алмагүл Алиханқызы.