Шараға Түрген ауылдық округіне қарасты Д.Қонаев атындағы, М.Ломоносов атындағы, А.Жексембеков атындағы және Таутүрген орталау мектебінің оқушылары қатысты. Өзінің құттықтау сөзінде Түрген ауылдық округінің әкімі Бота Елеусізова:
– Осындай табиғат аясында қай мезгілде демалсаң да бір ғажап күй кешесің. Құрметті жастар, мына ұйымдастырылып отырған шара тек Сіздер үшін. Демалысымызды көңілді өткізіп қана қоймай, табиғат ананы аялай білейік. Қоршаған ортаның тазалығын сақтап, еліміздің гүлденуіне өз үлесімізді қосайық – деді. Сондай-ақ, Іле-Алатау мемлекеттік ұлттық табиғи паркі Түрген филиалының директоры Жақсылық Жылқыбеков пен мекеме экологі Сәндігүл Қуанышова балғындарды қысқы мерекенің ашылуымен құттықтап, ең керемет жыл мезгілі сәтті өтуін тіледі. Кейіннен, көңілді ән айтылып, түргендік қыздар мың бұрала би биледі. Мектеп оқушылары қардан мүсін жасады. Арқан тартыс, кір тасын көтеру, қол күрес, шағын футбол мен шаңғыдан жарыстар ұйымдастырылып, оқушылар өз күштерін сынға салды. Келген қонақтар мен бүлдіршіндер таудан шанамен сырғанап, шат-шадыман күй кешті.
Сардарбек НҰРАДИН.