Жақында Түрген ауылдық округінің әкімдігінде округ әкімі Бота Елеусізова және жергілікті полиция қызметі басшысының орынбасары Мақсат Кәрібаев тұрғындармен кездесті.
Ұлт жоспары «100 нақты қадам» және жергілікті өзін-өзі басқару жүйесі негізінде жергілікті полиция қызметі өз жұмысын жер-жерде бастағаны аян. Олар ендігі жергілікті атқарушы билік өкілдеріне бағына отырып, қоғамдық тәртіп, тазалық және тағы да басқа мәселелер бойынша жұмыс жүргізеді. Сонымен қатар тұрғындар алдында есеп беруге міндетті. Полиция мен халық арасын жақындату, тәртіп орнату мақсатында жүзеге асқан реформаның берері көп деп жиынның мақсатына кеңінен тоқталды Бота Елеусізова. Бес бірдей учаскелік полиция қызметкерлерін тұрғындармен таныстырып өтті. Әкімдіктің қордаланған мәселелеріне тоқталды. Әрбір үй, әрбір аула бақылауда болуы қажет екендігін жеткізді. Келімсектер мәселесі де кеңінен сөз болды. Мақсат Кәрібаев сөз сөйлеп, жергілікті әкімдік және қауымдастық өкілдерімен бірлесе отырып учаскелік полиция қызметкерлері жүктелген міндетті жауапкершілікпен атқаратындықтарын жеткізді.
Ә.МАНАСБЕК.
