«Ант атқан». Бұл қазақ халқының түсінігінде аса ауыр қарғыс. Серт беріп, кейіннен жалт берген жауынгер ант атқан атанбақ. Алайда Тәуелсіз елдің айбынды ұландары берілген сертке қашан да бекем. Қаруын асынған, әскери тәртіпке берік 300-ге жуық жауынгер ант мәтінін анықтап әрі мақтана оқып, Отан алдында от кешуге дайын екендіктерін жеткізді. Бөлім командирі Константин Қуатов: «Бүгін Сіздер үшін ерекше күн. Ант беру – абыройлы міндет. Оны орындау одан да асқан жауапкершілік жүктейді. Бұл күні барлық Ұлттық Ұлан әскери бөлімдеріндегі сарбаздар ант қабылдау үстінде. Анттарыңызға адал, қызметтеріңізге берік болыңыздар» – деп, осыдан төрт жыл бұрын хат-хабар алмасу барысында атақты өнертапқыш, АК автомат қаруын ойлап тапқан жерлесіміз Михайл Калашников өз атынан әскери бөлімге аталған қарудың екі данасын тарту еткендігін жеткізді. Бұл қаруларды асына отырып ант қабылдау мәртебесі бір айлық оқу кезеңінде үздік шыққан үлгілі жауынгерге ғана бұйыратындығын айтқан Конс-тантин Қуатов жас жауынгер Олжас Абдуллаевты салтанатты ант қабылдау рәсіміне шақырды. Аталған жауынгер оқу кезеңінде ананың сүті, атаның қанымен сіңген өсиет пен өнеге, тәлім мен тәрбие сынды құндылықтар құндағында өскен ұлан екендігін көрсете білді. Осы себепті, аталған мәртебеге ие болды. Ата-анасын, туған-туыстарын қуанта білген үздік сарбаз ант бергеннен кейін, барлық жауынгер аталған рәсімнен өтті. Мемлекеттік Гимн орындалып, алаңда салтанатты шеру өтті.
Осыдан кейін бөлім командирі Константин Қуатов, Қаракемер ауылдық округінің әкімі Алтынбек Исаков, ардагерлер кеңесінің төрағасы подполковник Анатолий Головченко жауынгерлерге сәттілік тілеп, әскери борышын өтеу барысында сақ әрі саналы, батыл болуға бірауыздан үндеді.
Ә.МАНАСБЕК.
