Таң сәріден аудандық мәдениет үйінің алаңында Тәуелсіз еліміздің көк Туы мен «Нұр Отан» партиясының байрағын желбіреткен жастар ерекше көңіл-күймен бас қосты. Мәдениет үйінің бишілері жұртшылықтың көңілін көтеріп, флешмоб биледі. Ал әншілеріміз патриоттық әндер орындап, көпшілікпен бірге шырқады. Шара барысында сөз алған Бинәлі Әбдіқапасұлы «нұротандықтарды» кезекті жеңісімен құттықтай келе:

– «Белің мықты болса, бір басыңа. Елің мықты болса, бір ғасырға» деген даналар нақылы Елбасы Н.Ә.Назарбаев бастаған еліміздің қалаулы партиясы «Нұр Отанға» лайық десем артық айтқандық емес. Арайлы азаттық арқылы қол жеткізген жетістіктеріміздің баршасында «Нұр Отан» партиясының сүбелі үлесі бар. Төңірегіне тілектес серіктерін топтастырған партия тәуелсіздік жылдарында қоғамды жаңа жобаларға жұмылдыра білді. Бүгінгі сайлауда «Нұр Отан» партиясының жеткен жетістігі біздің жарқын жеңістеріміздің, көшіміздің түзу, көкжиегіміздің шуақты, бағытымыздың айқын екендігінің нақты айғағы.

Ендігі кезекте, біз ағымдағы жылдың 29 қаңтарында өткен «Нұр Отан» партиясының кезектен тыс ХVІІ съезінде қабылданған бағдарламасының тұғырнамасын жүзеге асыру үшін күш-жігерімізбен аянбай жұмыс жасай отырып, кешенді жоспармен Елбасының сындарлы саясатына негізделген бағдарламаларға қолдау көрсетіп, іргелі істердің ұйытқысы болуымыз қажет – деп аудан жұртшылығын бірлік пен жасампаздықтың негізін қалауға шақырды. Сондай-ақ, «Нұр Отан» партиясының мүшелері аудандық ұйғыр этно-мәдени бірлестігінің төрағасы Сулейман Махсутов, жалынды жас Марат Исаков, денсаулық сақтау саласының өкілі Назилия Абдуллаева партия өкілдерін жеңісімен құттықтап, жылы лебіздерін білдірді. Кейіннен, Дәурен Сәрсенбаев «Көк Тудың желбірегені» әнін орындап, жастар флешмоб биледі. «Нұр Отан. Нұрсұлтан. Қазақстан» деп ұрандаған алаңдағы жастар әнді бірге орындап, форумның көркін қыздыра түсті. Саяси науқандағы партияның жеңісіне арналған шараның соңы аудандық мәдениет үйінің қызметкерлері ұйымдастырған концертке ұласты.

                          Сардарбек НҰРАДИН.