Округ әкімі Ержан Әмірденов екеумізді Асқар Алдажаров қарсы алды. Ғимарат ішін аралатып, барлық бөлмелерді таныстырды. Кәсіпкердің айтуынша, балабақшаның іргетасынан бас-тап, шегесіне дейін сертификатталған. Барлық мемлекеттік талаптың негізінде бой көтеріп отыр.

– 3-5 жас аралығындағы бүлдіршіннен екі топ қабылданады деп жоспарлап отырмыз. Яғни, бір топқа 25 бала. Мұнда жатын бөлме, ойын, акт залдары асхана, басқа да бөлмелер заманауи құрал-жабдықтармен толық қамтылады. Тіпті, ауласын абаттандырудың өзіне 5 млн теңгеге жуық қаржы жұмсауды көздеп отырмыз, – дейді                           Асқар Алдажаров.

Сондай-ақ, мұнда 30-ға жуық жұмыс орны ашылады. Ең маңыздысы да осында: мамандардың еңбекақыларын мемлекет төлейді. Ол турасында:

– Елбасымыздың көреген саясатының нәтижесінде қазір істеймін деген кәсіпкерлерге жол ашық. Балабақшаны өзіміз салып отырғанмен, мемлекет тарапынан зор қолдауға ие болдық. Тіпті, құжаттарымызды заңдастыру, бағытын түзеуге округ әкімдігі қолдау көрсетті. Қазіргі уақытта да күн      сайын хабарласып, болмаса келіп, жағдайымызды сұрап отырады билік өкілдері. Оның өзі бізге күш береді. Сенімді жұмыс жүргізуімізге серпін береді. Сондай-ақ, қызметкерлердің еңбекақыларын да енді мемлекет төлейді. Соның нәтижесінде бүлдіршіндеріміз балалық шақтарын естен кетпестей өткізеді әрі ұлт ертеңін ойлайтын жастар өседі. Елбасымызға, облыс, аудан басшыларына мың алғыс!, – деп ағынан жарылды кәсіпкер.

Күре жолдың бойына қоныс тепкен осынау округте бүгінде 300-ге жуық бүлдіршін балабақша кезегінде екен.

– Серіктестікпен салынған бұл балабақша мәселені түбегейлі шешпесе де, бір жағымыздан шығады. Дегенмен құр қарап жатқан жайымыз жоқ. 280 орындық балалар бақшасын салуға жер бөлініп, құжаттары рәсімделіп, дайын тұр. 2017-18-ші жылдардың бюджетіне белгіленді. Дегенмен оған дейін де тағы бір кәсіпкер серіктестікте жұмыс істеуге ниет білдіріп жүр. Бұйыртса, ол да оң шешімін табар деген үміттеміз, – дейді Ержан Әмірденұлы.

Ал ынтымақтастықтың ырысындай болған бұл балабақшаны кәсіпкер Асия Алдажарова осы жылдың 1 маусымында округ балаларына тарту етсек деген ниетте. Қазір құрылыстың 80 пайызға жуығы тәмам. Сондықтан ауыл бүлдіршіндерінің қоныстой тойлауға күні жақын. Ұлт жоспарын ту еткен, сөйтіп өз өлкесін түлеткен мұндай кәсіпкерлеріміз көбейсін деп аттандық құрылыс алаңынан.

Қайнар ЖҰМАҒОЖА.