Сонымен, аудандық кәсіпкерлік бөлімі басшысының тіліне тиек болғандардың ішінен «Тамара» тігін шеберханасына тоқталуды жөн көрдік.
1999 жылы Қарақалпақстаннан келіп, туған жерге ту тіккен Далиева Тамара Рүстемқызы алғашында саудамен айналысып, кейіннен «Бақтияр» базарының ішінен жалға контейнер алып, ол жерде киім өңдейтін цех ашады 2003-2004 жылдары. Жалғыз өзі үлгермегендіктен жанына тігінші қыздар алып, бір-екі адамды жұмыспен қамтиды.
– Мамандығым – суретші-дизайнер. Суретке, ою-өрнекке қызығушылығымды оятқан әкем Рүстем Далиев болды. Ол кісі де суретші. Әсіресе, әкемнің қолынан шыққан оюлы сандықтары көрген жанның есін алады. Көп жылғы еңбегінің арқасында Еңбек ардагері атанған. Бүгінгі таңда қарамағымдағы «Тамара» дизайнерлік студиясында алты адам тұрақты жұмыс істейді. Жалақылары да жаман емес. Негізгі бағытымыз – ұлттық нақыштағы киімдерді насихаттау, дегенмен, әкімшіліктің қызметкерлеріне де, мұғалімдерге де костюмдер тігеміз. Сонымен қатар, кішкентай ұл-қыздардың ұлттық киімдерін де осы жерден табуға болады. Киімдер жалға да беріледі. Бағалары әр түрлі. Сапасына қарай сыны демекші, біздегі костюмдер бағасы 10 мың теңгеден басталады. Ұзатудың көйлектері 100 мыңға дейін барады кейде, – деген Тамара Рүстемқызы қынжылысын да жасырмады. «Ең қиыны – кәсібімді ашамын деушілерді қолдап, демейтін билік жоқ. «Жансая» сауда орталығының ішінен орын тепкен студиямның ашылуы наурыз айында болды. Оған дейін, яғни, қаңтар айында мен алдымен қалалық әкімшілікке бардым қолдау іздеп. Бірақ, өкінішке қарай, тіптен қабылдауына да кіре алмадым. Ренжулі қалпыммен аудандық әкімшілікке, кәсіпкерлік бөліміне бұрдым аттың басын. Ол жерден мені «Жұмыспен қамту орталығына» тіркелуге жіберді. Хош, онда да бардым. Аз пайызбен берілетін несие ғой – көздегенім. «Артынан хабарласамыз» деген уәде орындалмаған соң өзім несие алып, осы студияны аштым. Негізінен, микрокредитпен жұмыс жасаймын. Келушілер қатары аз емес, кәсібім жүріп жатыр. Әйтсе де, жеңіл өнеркәсіп саласына теңізге құйған тамшыдай болсын үлесіміз тиіп жатқан соң, билік тарапынан қолдау болса деймін» – деп ойын сабақтады «Тамара» тігін шеберханасының тізгінін ұстап отырған Тамара ханым.
Жеке кәсіпкер Тамара Далиева студиясында аптасына үш рет оқыту курстарын жүргізеді екен. Мұнда тігіншіліктің сырына қанығам дейтін қыздар келіп іс жүзінде жұмыс барысымен танысады, үйренеді. Арасынан жұмысы көңілінен шығатындарын тұрақты жұмысқа да қабылдауға мүмкіндігі жоқ емес.
«Еңбегіне қарай өнбегі» екенін білген Тамара Рүстемқызы «Қолы қимылдағанның аузы да қимылдайтынын» өз тәжірибесінен жақсы біледі. Дизайнерлік студияның есігі сағат таңғы 9-дан кешкі 17.00-ге дейін айқара ашық. Енді ұлттық киім іздеп шарқ ұрмай, «Тамара» тігін шеберханасынан қалаған үлгідегі қазақы киімді тауып алуларыңызға мүмкіндік бар, құрметті оқырман!
Алмагүл НҰҒМАН.