Ауданымыздың жолаушы тасымалдау  бағыттарын  қалпына  келтіріп, тұрғындардың әлеуметтік-тұрмыстық қажеттіліктерін  өтеуге жатпай-тұрмай атсалысып  жүрген азамат «Ақжол Агротранс» ЖШС-нің басшысы Руслан аға Қалиевтің еңбегін ел бағалап  отыр. Бұдан басқа аудан жастарын спортқа тартып, екі бірдей футбол командасын  жасақтап-жабдықтап аудан чемпионатына  қосып отырғаны бір бөлек әңгіменің тақырыбы. Елбасымыз Н.Ә.Назарбаевтың жиған-терген қара-жат, мүлкін қалталы адамдар қара  басының  қамына ғана  пайдаланбай елдің жағдайына қарасу туралы кәсіпкерлерге қойған талап-тіле-гін орындау үлгісін  көрсетіп жүрген осы Руслан ағамыз десек  қателеспейміз. Рахмет, Руслан Әбдібекұлы!            

Құрметпен Т.Иманбаев,

Талдыбұлақ тұрғындарының атынан.

Редакциядан: Есік қаласының байырғы тұрғындары кезінде 1-ші, 2-ші, 3-ші, 4-ші, 5-ші бағыттарда  жолаушыларға қызмет  көрсететін автобус маршруттарымен қаланың кез-келген  шетіне, орталығына және қалаға іргелес Көктөбе, Өрікті ауылдарына арзан бағамен  қатынай  алатын. Одан кейін  өтпелі кезең келіп автокөлік, автокәсіпорындар жеке қолға өтіп  кетті  де  ондаған  жылдар жұмысы  жолға қойылған  жолаушы тасымалы сыпайылап  айтқанда шашылып қалды. Жолаушылар бірде жаяулап, бірде «жабайы» таксистердің  қызметіне жүгінуге мәжбүр  болып  өзі «тесік» қалталары қағылып  жатты.

Биылғы наурыздың  басында аудандық  мәслихат-тың  бірнеше шақырылымының депутаты «Ақжол  агротранс» ЖШС-нің  және «Еркін» ЖК басшысы Р.Қалиев Есік қаласындағы екінші, үшінші маршруттарды іске қосып, күре жолдан жырақта жатқан  Алмалы ауылын  Есікпен  жалғап  үшінші маршрутты, аудандық аурухана мен «Қырық үй» (Площадка) аталған қаланың тау  бөктеріндегі бөлігіне екінші маршрут жіберілгені жайлы газетімізде жазылған болатын.

Одан беріде Талдыбұлақ пен  Ташкенсаз-Баяндайға да қоғамдық  көлік қатынай бастағанын  жоғарыдағы алғыс растап отыр. Сөз соңында Есік қаласының  тұрғыны айтқан есебін келтіре кетейік. «Есік  гуманитарлық-экономикалық  колледжінде оқитын  ұлыма әр  күн  сайын  жолына, тамағына деп 500  теңге беруші  едім. Оның 300 теңгесі таксиге кететін. Қоғамдық  көлік – екінші  маршрут  ашылғанын естімеппін. Бір  күні балам берген 500 теңгенің жартысын қайырып әкеліп тұр: жолға оқуға барып-келуіме бар болғаны 100-ақ теңге кетті, – дейді. Осы көлікті  жүргізген кәсіпкерге алғысымыз шексіз».