Гүл көктеммен қатар келген гүл жайнаған аруларды құттықтауға аудандық мәслихат хатшысы Бекет Ахметов, «Нұр Отан» партиясы аудандық филиал төрағасының бірінші орынбасары Қуат Байғожаев, аудан әкімінің орынбасары Айбек Бидаев, қоғамдық кеңес төрағасы Әділбай Талқамбаев, «Еңбекшіқазақ» газетінің бас редакторы Хайролла Ахметжанов, ардагерлер кеңесінің төрағасы Тілеулес Ұзақов, ауылшаруашылығы қызметкерлерінің кәсіподақ төрағасы Ильян Жакеев келіп, қыз-келіншектерге ақ тілектерін жеткізді. Мерекенің ашылуында сөз сөйлеген Бинәлі Әбдіқапасұлы:
– Адам баласы қыстан аман-есен шығып, жер ананың бусанатын көктем мезгілін сағына күтеді. Анасын құрметтеген әрбір жан жылдың осы бір ғажайып мезгілімен қатар келетін халықаралық әйелдер күнінде өз жақындарына қуаныш сыйлауға асығады. Біз де осы күнге жетіп, өздеріңізбен бір дастархан басында жиналып отырмыз. Сіздер секілді алтын құрсақты аналар мен іскер әйелдердің көптігі – біз үшін мақтаныш – дей келе Бинәлі Әбдіқапасұлы әлемдегі дамыған 100-ге жуық мемлекет 8 наурызда аналарын құттықтайтындығын атап өтті. Бұл – өзгелермен иық тірестіремін деп талпынған кез-келген мемлекет алдымен ұрпақ тәрбиесінде басты рөл атқаратын әйелдер қауымына көп көңіл бөлетіндігін білдіреді. Осыларды сөзіне арқау еткен аудан басшысы жиналған аналар қауымына алғысын жаудырды. Кейіннен, төл мерекелерінде гүлдей құлпырған аналарға сыйлықтар табысталып, гүл шоқтары ұсынылды. Жиын барысында кезекпен сөз сөйлеген құрметті қонақтар кез-келген мейрамда нәзік жандыларды елеусіз қалдырмайтын аудан басшысына алғыс айтып, көпшілікті мерекемен құттықтады. Мерекелік кешті әуезді әуенмен әрлеген ауданымыздың өнерпаздары аналарға әнмен шашу шашып, құлақ құрышын қандырды. Әсем қимылдарымен көздің жауын алар «Улыбка» би ұжымының билері талайды тамсандырды. Мерекелік дастарханнан дәм татып, концерттік бағдарлама тамашалап, зор құрметке ие болған аналар қауымы кеш соңында аудан басшысымен естелік суретке түсіп, көңілді тарқасты.
С.НҰРАДИН.