Заң – алаңсыз өмір сүруіміздің өлшемі. Ол неғұрлым қараша халыққа жақындаған сайын тұрмыс түзеледі, түрлі ішінара кемшіліктер күзеледі. Осы ретте 2018 жылдың 1 шілдесінен базалық зейнетақы тағайындау методикасы өзгермек. Бұл турасында аудан әкімдігінің мәжіліс залында кеңейтілген отырыс өтті жақында. Оған «Азаматтарға арналған үкімет» мемлекеттік корпорациясының өндірістік қызмет үйлестіру жөніндегі басқарушы директоры Біржан Жүнісов, Еңбек, әлеуметтік қорғау және көші-қон комитетінің Алматы облысы бойынша департамент басшысы Зиядин Агибетов, «ӘТВЕО» департаментінің Алматы облысы бойынша директоры Гүлшат Баешева және аталған департаменттің Еңбекшіқазақ аудандық бөлімшесінің басшысы Жазира Муханбеденова қатысты. Отырысты аудан әкімінің орынбасары Айбек Бидаев жүргізді.
Күн шығып, ай жүзуін тоқтатпаса тіршілік те жалғасады. Сол секілді әр сәттегі қилы қимыл-қозғалыстар заңдық тұрғыдан таразыланатыны тағы бар. Айталық, қазіргі уақытта барлық зейнеткерлер еңбек өтіліне қарамастан базалық зейнетақыны төменгі күнкөріс деңгейінің 54 пайызын яғни, 14466 теңге мөлшерінде алса, 1 шілдеден еткен еңбек, төккен тері сараланатын болады. Яки, егер адам тұрақты жұмыс істесе және зейнетақы қорына 10 жыл аударымдар жүргізсе немесе мүлдем жұмыс жасамаса, онда оған төменгі күнкөріс деңгейінің 54 пайыз мөлшерінде базалық зейнетақы ғана тағайындалады. Ал еңбек өтілі 10 жылдан асса, әр жылына базалық зейнетақы 2 пайызға ұлғаймақ. 20 жыл еңбек өтілімен – күнкөріс деңгейі 74 пайыз, еңбек өтілі 33 жылдан асса, ең жоғарғы зейнетақының иегері атанады. Бұл турасында сала мамандары бүге-шігесіне дейін түсіндіріп өтті.
«Зейнетақыға жиналған қаржы қорын қашан алуға болады?» деген сұраққа:
– Зейнетақыға жиналған қорды тек үш жағдайда ғана ала аласыздар: бірінші – азамат шетелге көшер алдында, екінші – қайтыс болған жағдайда мұрагерлерінің алуы-на және үшіншісі – зейнетке шыққанда. Алайда, ол базалық зейнетақысына қосылып ай сайын беріліп отырады» деді Біржан Уәлиұлы. Бұдан да өзге бірқатар жеке сұрақтар қойылып, мамандар оң жауабын берді.
Қайнар ЖҰМАҒОЖА.