Жақында ел тәуелсіздігінің 25 жылдығы мен медицина қызметкерлері күніне орай Есік қаласындағы дене шынықтыру-сауықтыру кешенінде «Спорттық дене шынықтыру – әр адамға пайдасы бар» атты спартакиада өтті. Мерекелік шараға аудандық мәслихат хатшысы Бекет Ахметов, ішкі саясат бөлімінің басшысы Момунжан Исламов, спорт және дене шынықтыру бөлімінің басшысы Ерболат Сарабеков және аудандық аурухана директорының орынбасары Гүлнар Құраметова қатысты.

– Құрметті медицина қызметкерлері, сіздердің ел дамуында атқарған еңбектеріңіз зор. Халықтың саулығын ғана күзетпей, кеселдің алдын алып, жанға шипа бересіздер. Сіздер саламатты өмір салтын насихаттап қана қоймай, өздеріңіз де сол қағиданы ұстанып, көпшілікке үлгі болып келесіздер. Оның бірден-бір дәлелі, жыл сайын дәстүрлі түрде ұйымдастырылатын медицина қызметкерлері арасындағы спартакиада. Осы жарыста барлықтарыңызға сәттілік – деп Бекет Ахметов қатысушыларға ризашылығын жеткізді. Гүлнар Құраметова да әріптестерін құттықтап, мерекенің маңызын түсіндірді. Дене шынықтыру-сауықтыру кешенінің директоры Абай Сырғабаев қатысушыларды сайыс ережелерімен таныстырды.

Жарыста әр ауылдық округтің дәрігерлік амбулаториялары мен аудандық емхананың қызметкерлері өнер көрсетті. Сайыс бірнеше кезең бойынша өрбіді: ерлер арасында шағын футбол, волейбол, әртүрлі қашықтық бойынша ұзындыққа жүгіру мен арқан тартыс.

Әр қатысушы өзінің қалаған спорт түрі             бойынша өнер көрсетті. Ақ халаттылардың барлығы да белсенділік танытып, өздерінің спорттан кенде еместігін дәлелдеді. Әсіресе, қыздар жағы қашықтыққа жүгіру мен волейбол ойнауда жанкүйерлердің көңілінен шықты. Ерлер шағын футбол ойнап, ала допты ұршықша иірді. Таңертең басталған сайыс кешке дейін созылды. Себебі, қатысушылардың санында шек жоқ. Бұл – медицина қызметкерлерінің саламатты өмір салтын насихаттап қана қоймай, өздері спортты жанына серік ететінінің белгісі.

Ойын нәтижесінде, волейболдан ерлер арасында бәйдібекбиліктер, ал әйелдер арасында аудандық емхананың құрамасы жеңімпаз атанды. Эстафетадан (100м, 4 адам) ерлер арасында Түрген ауылдық дәрігерлік амбулатория командасы мен әйелдер арасында аудандық емхана қызметкерлері үздік деп танылды. 35 жасқа дейінгі ерлер арасындағы жеңіл атлетикадан (1000 м) М.Балабек, әйелдерден (800м) К.Гучимина, 35 жастан жоғары П.Шамахунов пен Д.Қасенова өзгелерден оқ бойы озық шықты. Арқан тартыс сайысында аудандық перзентхана өзгелерден басым түсті. Бөлек ауылдық дәрігерлік амбулаториясы белсене қатысқаны үшін марапатқа ие болса, Х.Бижанов дәрігерлік амбулаториясы әдемі киімдерімен ерекшеленді. Аудандық емхана ең үздік команда деп танылып, Ащысай дәрігерлік амбулаториясы ынталандыру сыйлығына ие болды. Жеңімпаз командалар мен қатысушылар алғыс хаттармен марапатталып, бағалы сыйлықтар табысталды. 

Сардарбек НҰРАДИН.