«Үміт үйі» қоғамдық қорының өкілі әрі Ащысай ауылдық амбулаториясында психолог болып жұмыс атқаратын Көшкінов Жүрсін Жәнібекұлы халық үшін ауадай қажет медициналық құралдарды ауылдық амбулаторияларға тегін таратуда. Екі жылдан астам уақыт медицина саласын қолдауға қоғамдық қорын бағыттаған Жүрсін Жәнібекұлы бүгінгі таңда Германия, Швейцария мемлекеттеріндегі серіктестерімен келісімшарт жасасқан. Сол арқылы бізге жеткен заманауи медициналық құралдар тұрғындар денсаулығының жақсаруына септігін тигізуде.
Жастайынан жақсылыққа жаны құмар болып өсіп, ержете келе жан-жақты мүмкіндіктерді пайдаланып, балалар үйіне, көмекке мұқтаж жандарға жәр-демдесуге барынша атсалысып жүрген ел ағасы жақында тағы да тұрғындар алғысына бөленді. Ащысай ауылдық амбулаториясына жиналған Қазақстан, Көктөбе, Достық, Қаракемер, Байсейіт, Жаңатұрмыс, Тескенсу тағы да көршілес ауылдардан келген психолог, әлеуметтік қызметкерлер және мейірбикелер өз амбулаторияларына қажетті әрі жетіспей жатқан медициналық құралдарға ие болды. Атап айтсақ, акция барысында жалпы құны 2 млн 859 мың теңгеге әр амбулаторияға үштен тонометр, градусниктер, әр амбулаториядағы төсек санына қарай жамылғылар мен олардың тысқаптары, микроскоп, электрокардиограмма, катетерлер, центрифуга, гигрометр сынды құралдар таратылды. Сонымен қатар, мүгедектер арбасы, ходуноктар, жедел-жәрдем қораптары тағы бар.
«Германиялық серіктестерді ша-қыртып, олар ауылдарды аралап, амбулаториялардың хал-ахуалымен танысып кеткен болатын. Сол сапарларында ауыл тұрғындарының көздерін тегін тексеруден өткізіп, қажет болғандарына көзілдіріктерін де берген-ді», – дейді «Үміт үйі» қоғамдық қорының өкілі Жүрсін Көшкінов.
Акция барысында Жүрсін ағаның психолог әріптестері де сөз алып, тұрғындар үшін атқарып жатқан еңбегінің ерен екендігін тілге тиек ете отырып, алғыс білдірді. Алдағы жұмыстарына табыс тіледі. Айта кетерлігі, спортқа жақын Жүрсін Жәнібекұлы жастарға үнемі қолдау көрсетіп, демеушіліктен тартынған емес. Түрлі жарыстар, көңілді старттар ұйымдастырылып, өткізіліп тұрады ел ағасының қолдауымен.
«Өзіңді ғана емес өзгені де ойлау – жүректегі мейірімділік пен еліңе деген жанашырлықтан, патриоттықтан туатын сезім. Не нәрсені болмасын шын жүректен, ақ пейілмен жасау керек. «Не ексең, соны орасың» дейді ғой қазақ халқында. Шын мұқтаждарға көмек көрсеткеннен тек қуаныш, позитив аласың. Жүрегің жайланады», – деген Жүрсін Көшкінов әріптестерін бірлесе, топ болып жұмыс жасауға шақырды.
Динара Қасенова,
Қаракемер ауылдық амбулаториясының меңгерушісі,
облыстық мәслихат депутаты.