Жақында аудандық кітапханада «Парасат» ордендерінің иегері, Мәдени ағарту ісіне еңбегі сіңген қызметкер, халық жазушысы Әбіш Кекілбаевтың 80 жылдығына орай «Әбіш – рухани ұлы тұлға» тақырыбында аудандық байқау өтті. Кешті кітапхана қызметкері Гүлия Саурықова жүргізді.

Орта мектеп оқушылары қатысқан байқау 3 кезеңнен тұрды. Алғашқы сайыста балалар өздерінің оқитын шығармасына сәйкес сурет салып, поэзия мен прозаны қылқаламмен бейнеледі. Екінші кезеңде, Әбіш Кекілбаевтың өлеңдерін жатқа оқыды. Қорытындысында оқушылар шығармалары бойынша сахналандырылған көрініс қойып, тақырыпты аша түсті.

Әр мектептен бір оқушы сынға түскен байқауда ақын, жазушы Шаяхмет Құсайынұлы, аудандық мәдениет және тілдерді дамыту бөлімінің бас маманы Балауса Шарғынова талантты оқушылардың еңбегіне баға беріп, төрелік етті.

Шараға тыңғылықты дайындықпен келген 7 білім ордасынан іріктелген балалар әдеби кешті жоғары деңгейде өткізді. Нәтижесінде, бас жүлде В.Терешкова атындағы орта мектептің оқушысы Аружан Сазановаға бұйырды. І орынға Қ.Орымбетов атындағы орта мектептен келген Артықгүл Янгибаева, ІІ орынға Сабина Рыс-пекова жайғасты. Үздік үштікті Абылайхан атындағы орта мектептің 8 сынып оқушысы Жанеля Жұматай қорытындылады. Жеңімпаздар Алғыс хаттармен марапатталып, бағалы сыйлықтар табысталды.

С.НҰРАДИН.