Тұңғыш Президент күнін Көктөбе орта мектебі ерекше форматта атап өтті. Мереке қарсаңында мектеп оқушылары түрлі сала өкілдерімен кездесіп, көкейдегі сауалдарын қойды.

Атап айтқанда, 6 «Б», 9 «Б» сынып ауыл ақсақалы Ағапаша Дулаевпен кездесіп, ақсақалдың өмірінен сыр шертті. Тағылымды әңгімелерін тыңдап, ақ батасын алды. 6 «А», «Ә» сыныптар «Дүмбірлеткен дала қызы» тақырыбында Раушан Мондия-ровамен жүздесу өткізді. ҚР Мәдениет қайраткері Балтабай Ыбырайұлы 5 «А» және «Ә» сынып оқушыларымен қазақтың ұлттық аспабы жайлы әңгіме өрбітті. Домбыраның құрылымы мен оның шығу тарихы айтылған отырыс балаларға ұлттық өнерді тануға үлкен мүмкіндік берді. 7 және 8 «В» сыныптың балалары тарих пәнінің мұғалімі Гүлтанат Алтынбаеваға көкейдегі сауалдарын қойып, тамыры тереңде жатқан тарихпен, ұстаздық өнермен танысты. 7 «А», 8 «А» сынып аудандық «Еңбекшіқазақ» газетінің тілшісі, журналист Сардарбек Нұрадинге түрлі бағыттағы сұрақтарын қойып, журналистика мамандығына қызығушылық танытты. Кездесулер соңы сыр-сұхбатқа айналып, балалар өздерінің өнерлерін ортаға салды.

Өз тілшіміз.