Тағдыр талайында сан сүріндік, сан құладық, сонда да ақ сәулесін шашқан арманымыздан адаспадық. Көкбөрідей көкке қарай ұмтылдық. Досымызға құшақ аштық, дұшпанымызға қанды қылыш тостық. Сөйтіп, егемендігімізді алдық. Жер асты кенге, жер үсті төлге толған осынау ұлан-ғайыр өлкенің бүгінгі иесі де – біз, киесі де  – біз: Қазақстан дейтін  – Тәуелсіз мемлекет. Тарих толқынында қылаң берген дамылсыз дауылдың да, құйынды саяси жауынның да өтінде тұрған өр бабаларымызға, Қайраттай ағаларымызға ерлігі үшін, өрлігі үшін мың тағзым. Аудан әкімі Бинәлі Ысқақ, аудандық мәслихат хатшысы Бекет Ахметов, аудан әкімінің бірінші орынбасары Айбек Бидаев, «NurOtan» партиясы аудандық филиал төрағасының бірінші орынбасары Қуат Байғоджаев, облыстық мәслихат депутаты Жангелді Осанның қатысуымен өткен салтанатты жиында алғашқы құттықтау сөз аудан басшысына берілді.

– Сіздерді және сіздер арқылы барша аудан тұрғындарын елдігіміздің ерекше мерекесі, баға жетпес құндылығымыз «ақ түйенің қарны жарылып» бар игілігіміздің бастауына айналған азаттықтың арайлы ақ таңы болған Тәуелсіздік күнімен шын жүректен құттықтаймын, – дей келе тарихқа аз-кем сапарлады: – Биыл рухы асқақ, тұғыры биік, әлемге бейбітсүйгіш ел, толерантты ұлт ретінде танылған төл мемлекетімізге 28 жыл толды. Жер шарын мекендеген барлық халық азаттықты арман етеді, еркіндікті мақсат тұтады. Бар ғұмырын аттың жалы, түйенің қомында өткізген ата-бабаларымыздың да ғасыр-лар бойы аңсаған арман-тілегі де сол еді. Бүгінде бұл тілек орындалып, тәуелсіздікке қолы жетіп, мұраты ізгілікпен өрілген байтақ ел, дария көңіл, дана қазақ халқының ғұмыр бойы іздеген – бірлігі, тілеген – тұтастығы, қыран құстың темір топшысын талдырып, тегеурінді тұлпардың тұяғын балқытар шеті мен шегі жеткізбейтін даламызда орнады, – деді.

Салтанатты жиын барысында еңбегімен еленген тұлғалар да ел алдында мерейі асты. Айталық, облыстық ауылшаруашылығы саласын дамыту жолындағы жемісті еңбегі үшін облыс әкімінің Құрмет грамотасымен Талғат Алдажаров, Алматы облысының ауыл шаруашылығы басқармасы басшысының Құрмет грамотасымен Ермек Ускенбаев, ҚР Ұлттық қауіпсіздік комитеті төрағасының бұйрығымен 2 дәрежелі «Шекара қызметінің үздігі» төсбелгісімен Ақжол Сағымжан марапатталды. Бірқатар азаматтар аудан әкімінің Алғыс хатына ие болды. Ең айрықша айтар сәт, тәуелсіздік күнінде төтенше жағдайлар бөліміне екі арнайы өрт сөндіру көліктерінің кілті табыс етілді. Халық алдында көлік кілтін аудан басшысы аталған бөлім басшысы Рахман Каримжанға ұсынды (суретте).

Шара соңы аудан өнерпаздарының концерттік бағдарламасына ұласты.

Қайнар ЖҰМАҒОЖА