130 ұлт пен ұлыс өкілдеріне мекен болған жерұйық Қазақ жері татулық пен бейбітшілік дейтін қастерлі ұғымдарды тәуелсіздік алған алғашқы күннен қастер тұтуда. Бұл еліміздің адал ниетінен нендей қиыншылық болса да айнымайтын ақ жүрек екендігін айғақтаса керек. Бұл пікірге ауданымыздың өзге ұлт өкілдерімен қатар қазақ жұрты да ортақ.

Ізбасар Бұралқиев:

–       Татулық ұғымы имандылық, ізгілік, адалдық, махаббат дейтін ұғымдармен астасып жатыр. Бұл үшін адам жүрегінде зор рухани қуат болуы қажет. Татулықтың шаңырағын шайқалтпай, босағасын солқылдатпай тік ұстау үшін. Ал иман ізгілігі жоқ елде береке де, татулық та болмақ емес. Сондай-ақ, кез-келген қиыншылыққа ежелден сабыр еткен елміз. Ата дініміз Исламда сабыр ету ең ізгі амалдардың бірі ретінде айтылса, ынтымағымызды ыдыратып алмау үшін де сабыр еткен абзал.Бүгінгі әлемді әуреге салған аты жаман ауру да дәл осы жоғарыда айтылған ізгі амалдар арқылы жеңіліс табатыны ақиқат.

***

Амзаев Кошали:

–       Ырыс пен ізгілік ынтымағы берік елге жұғымды. Айғай-шу, ырду-дырду қиуы қашқан елді иектейтіні ақиқат. Ал біздің ел ежелден бірлік, татулық ұғымдарына берік. Сол үшін де нендей қиын-қыстау кезеңдерді еш қиналмай бастан өткізді. Бүгінгі қиыншылықтар да дәл осы ынтымақ ұғымын берік ұстайтын болсақ  өздігінен келмеске кетпек. Біз қазақ халқына разымыз. Бойына қайырымдылық, мейірім дейтін игі жақсы қасиеттерді жиған, кеңпейіл, мәрт, ақжүрек жұртыма тыныштық пен бейбітшілік, береке тілеймін. Бүгінгі ел басына туған қиыншылық келмеске кетсін. 

***

Сабыр Лазгиев, Түрген ауылы ақсақалдар алқасының төрағасы:

–       Татулық дейтін үлкен күш. Ел іші тату болса, онда ешбір қуатты жау да ала алмайтыны анық. Айталық, Ұлы Отан соғысы жылдарында қаншама ұлт пен ұлыс өкілдерінің ынтымағының арқасында фашист басқыншылары тас-талқан етілді. Қазақ жері де осы ынтымақ ырысын 29 жыл бойы кірбің түсірмей қастерлеу үстінде. Бүгінгі қиыншылықтар да ел іші тату болса, ешбір қиыншылық әкелмейтіні ақиқат. Өйткені, халқымыздың ауруға қарсы иммунитеті қуатты. Әлемдік ғалымдардың айтуынша ет пен қымыз, шұбат ішетін халықтардың аурудан айығу мүмкіндігі басым.

***

Зубайда Асанова:

–       Татулық – ол отба-сының ұйытқысы. Қандай жағдай болмасын, осы берекелі ынтымағымыздан айырылмауға тырысу керек. Себебі ол өзгелерде жоқ орасан зор байлық. Әсіресе жастар қауымы бізге ізбасар болып, осы татулықты одан әрі нығайтуды жалғастыруы керек. Татулықсыз береке, ырыс жоқ. Тату елде бәрі бар.

Халқымыздың «Берекені көктен тілеме, бірлігі мол көптен тіле» дейтіні содан.  

Әділет САРЫБАЙ