Тәуелсіздік ақ таңының атқанына биыл ширек ғасыр толды. Бабалар аңсаған күнге жету біз үшін оңай болған жоқ. Сондықтан, егемендіктің 25 жылдығы аясында елімізде түрлі шаралар ұйымдастырылып, халқымыз қадір тұтқан Тәуелсіздік мерекесі тойлануда. Осы игі іс жақында ауданымызда жалғасын тапты. Облыс әкімдігі және облыстық мәдениет басқармасының ұйымдастыруымен «Жұлдызды 25 іс-шара» аясында «Жетісу керуені» атты акция өткізілді.
Қазан айының басында облыс бойынша жолға шыққан өнерпаздар керуені өткен аптада ауданымызға тоқтап, Есік қаласындағы мәдениет үйінде мерекелік концерт ұйымдастырды. Шараның ашылу салтанатында жұртшылыққа аталған керуеннің маңыздылығын айтқан мәдениет және тілдерді дамыту бөлімінің басшысы Мұрат Ақаев жиылғандарды мерекемен құттықтады.
– Тәуелсіздік бізге оңай жолмен келмеді. Сондықтан оны қадірлеп, қастерлеу әрбіріміздің азаматтық борышымыз. Әсіресе, жастар жағы егемендікті көзінің қарашығындай сақтап, мемлекеттің дамуы жолында қызмет етер болса, алынбайтын асу жоқ – деп, жастарды отансүйгіштікке шақырды.
Концерт барысында Сүйінбай атындағы Алматы облыстық филармония және «Алматы әуендері» концерттік бірлестігі жанындағы «Құлансаз» фольклорлық-этнографиялық ансамблінің өнерпаздары күмбірлеген қара домбыраның үнімен құлақ құрышын қандырып, жиылған көпшілікті халық әндерімен сусындатты. Тілек Нағымбаев, Нұрбол Сәдуақасов, Жомарт Тәкебаев және басқа да әншілер жанды дауыста әннен шашу шашты. «Құлансаз» фольклорлық-этнографиялық ансамблінің мың бұралған бишілер тобы өз өнерімен көрерменді тәнті етті. Облыстағы шоқтығы биік өнер жұлдыздарының концертін тамашалаған аудан тұрғындары ерекше күйге бөленіп, көңілді тарқасты.
Сардарбек НҰРАДИН.
