Балалар – біздің болашағымыз. Ести-ести жауыр болған сөз шығар, алайда, бұл – ақиқат. Ата-бабаларымыз білектің күшімен, найзаның ұшымен, ақыл-парасат-тың ұшқырлығымен қорғаған ұлан-ғайыр жеріміздің келешек иесі де бүгінгі бүлдіршін-дер. Осы жерді, елді көркейтіп, әлемдегі озық 30 елдің қатарына қосатын да біздің балаларымыз. Елбасы Н.Ә.Назарбаев бір сөзінде: «Балаларға жағдай жасау – болашаққа құйған инвестициямыз» – деп атап өткен болатын. Иә, бүгінде келешекке инвестиция құюдан еліміз аянып жатқан жоқ. Оның ішінде ауданымызда балалар мен жастардың толыққанды білім алуына барлық жағдай жасалуда. Игі шара жақында Бәйдібек би ауы-лында жалғасын тапты. Ауылдың мектеп жасына дейінгі бүлдіршіндеріне арналған жаңа «Достық» балабақшасының лентасы қиылды.
Қазақстан Республикасы Тәуелсіздігінің 25 жылдығы қарсаңында қос мерекеге куә болған бәйдібекбиліктердің қуанышына ортақтасуға арнайы барған аудан әкімі Бинәлі Ысқақ, мәслихат хатшысы Бекет Ахметов, аудан әкі-мінің орынбасары Айбек Бидаев, бөлім басшылары мен округ әкімі бүлдіршіндердің шаттығына куә болды. Өзінің құттықтау сөзінде жиылған жұртшылықты мерекемен құттықтаған Бинәлі Әбдіқапасұлы аудандағы мектепке дейінгі білім берудегі жеткен жетістіктерге тоқталып өтті:
– Бүгін бүлдіршіндеріміздің игілігіне берілейін деп отырған нысан аудандағы биылғы жылы ашылған сегізінші жекеменшік балабақша. Ал соңғы жылдары тек екі 280 орындық мемлекеттік жаңа балабақша бой көтерді. Қалғандары күрделі жөндеуден өткен білім орындары. Осылайша, биыл біз аудандағы 3-6 жас аралығындағы 14 мың 700 баланың 82 пайызын балабақшамен қамтып отырмыз. Бұл көрсеткіш осыдан бес жыл бұрын 49 пайызды құраған болатын. Бұның барлығы баға жетпес Тәуелсіздіктің арқасында жеткен жетістігіміз – деген аудан басшысы білім саласындағы жетістіктерді де сөз етті. Қуанышты бөлісуге келген қонақтар мен ауыл тұрғындарына алғысын жеткізген балабақша инвесторы Асқар Алдажаров бүлдіршіндердің еш кедергісіз білім алып, тәрбиеленуіне жағдай жасау – әр азаматтың борышы екендігін атап өтті. Кейіннен, Бинәлі Әбдіқапасұлы ауыл қарияларымен бірге балабақшаның лентасын қиып, ғимаратты аралады. Жатын орын, асхана, жуынатын бөлмелерді қараған қонақтар оң бағасын берді. Балабақшаның акт залында балғындар мерекелік концерт ұйымдастырып, Тәуелсіздікті жырлады. Еркін елдің ертеңі болған балалардың өнеріне көпшілік тәнті болып, ақсақалдар ақ батасын берді.
Айта кетейік, 50 бүлдіршінге арналып салын-ған «Достық» балалар бақшасы үш тілде білім береді. Мұнда түрлі үйірмелер жұмыс жасап, балғындардың өнерін шыңдайды. Сонымен қатар, тәрбиеленушілерді тасымалдауға арнайы көлік те бар.
Сардарбек МАЙДАБЕКҰЛЫ.
