12 мыңнан астам мүшесі бар «Нұр Отан» партиясының аудандық филиалы бүгінде тұрғындардың қордаланған мәселелерін шешуге ықпал етіп, жұртшылықтың алғысына бөленуде. Сәйкесінше, партиялық ұжымның еңбегі еленіп, марапаттарға ие болуда.
Жақында Астанада өткен «Нұр Отан» партиясының мерекелік салтанатты жиынында Еңбекшіқазақ аудандық партия филиалының мерейі тасыды. Республикадағы 238 аудандық партия филиалының арасынан суырылып, «Ең үздік аумақтық қоғамдық қабылдау» республикалық байқауының жеңімпазы деп танылды. Аталған байқаудың ұйымдастырылғанына аз уақыт болған жоқ. Осы кезең аралығында аудандық партия филиалының қоғамдық қабылдауына 330 азамат өтінішпен келген. Оның 67 пайы-зы оң шешімін тауып, қалған 33 пайызына кеңес беріп, бағыт-бағдар сілтеген. Өтініштердің барлығы тасада қалмай, тиісті органдарға жолданып, оңтайлы шешілуіне партия филиалы тарапынан барынша ықпал жасалған.
– Бұл жеңіс – аудандағы партия мүшелерінің, партия филиалы ұжымының бірге бағындырған белесі десек, артық айтқандық емес. Сонымен қатар, қоғамдық қабылдауға келгендердің мәселесін шешуде үлкен рөл атқарған аудандық партия филиалының төрағасы, аудандағы басқарма мен бөлім басшыларының еңбегін атап өтуге тұрарлық – дейді аудандық партия филиалы төрағасының бірінші орынбасары Қуат Байғожаев. Сондай-ақ, Қазақстан Республикасы Тәуелсіздігінің 25 жылдығы қарсаңында Қуат Сұлтанұлы ауданымыздың дамуына үлес қосып жүрген партия белсенділерін «Нұр Отан» партиясы облыстық филиал төрағасының бірінші орынбасары Ғалиасқар Сарыбаевтың Алғыс хатымен марапаттады. Бірнеше азаматқа патриялық билетін табыстап, жұртшылықты мерейлі мерекемен құттықтады.
Сардарбек НҰРАДИН.
