Аудан әкімі Қуанышбек Қашқымбаев ұстаздар мен оқушыларды білім күнімен құттықтады.
Құрметті ұстаздар мен қымбатты оқушылар!
Сіздерді білім күнімен және жаңа оқу жылының басталуымен шын жүректен құттықтаймын!
Бүкіл әлемді жаулаған коронавирус індетінің кесірінен биылғы Білім күні жылдағыдан өзгеше атап өтілетін болады.
Білім күні – жалпыхалықтық үлкен мереке. Жаңа оқу жылының басталуы өмірімізде қастерлі дәстүрге айналып, бірталай ұрпақтарды біріктірді.
Білім – адам баласының өмірлік серігі, өз тағдырының тұғыры. Ал ұстаздар – осынау жарқын әлемге жол ашушылар.
Шындығында, ғылымның, жаңа технологиялардың қарқынды дамуы өмірде жоғарғы кәсіби білімді, болашаққа талпынысты, жаңа инновациялық ізденістер мен талаптарды қажет етеді.
Мемлекеттің қолдауымен сапалы және қолжетімді білім алуға қолайлы жағдайлар жасалған. Жыл сайын білім саласына қаражат көлемі ұлғаюда, білім ошақтарының материалдық-техникалық базасы нығаюда, оқу процесіне жаңа технологиялар енгізілуде. Біздің міндетіміз – осы үдерісті сақтап, жандандыру.
Айтулы мереке күні оқушыларды, мектеп ұжымдарын, ата-аналарды, әсіресе мектеп табалдырығын бірінші рет аттап отырған бүлдіршіндерді шын жүректен құттықтаймын!
Сіздерге жақсы көңіл-күй, зор денсаулық, білім жолында жаңа жетістіктерге жетулеріңізді тілеймін!