Жақында Қайназар ауылдық мәдениет үйінде мекеме директоры Райхан Жанбосынованың ұйымдастыруымен Қазақ хандығының 550, Ұлы Жеңістің 70, Қазақстан халқы Ассамблеясы мен Конституцияның 20 жылдығына арналған есеп беру концерті өтті. Оған «Нұр Отан» партиясы аудандық филиал төрағасының бірінші орынбасары Қуат Байғожаев, Рахат ауылдық округінің әкімі Ахмет Жолдыбаев пен ауыл тұрғындары қатысты.
Ашылу рәсімінде Ахмет Жолдыбаев:
– Құрметті тұрғындар, өздеріңізге белгілі жақында Тараз қаласында Қазақ хандығының 550 жылдығына арналған ауқымды шара өтті. Оған Елбасы Н.Ә.Назарбаевтың өзі қатысып бірнеше игіліктің куәсі болған еді. Бүгінде дүбірлі той округімізде жалғасын табуда.
Осы мерекені атап өтіп қана қоймай, біз болашақ ұрпақтың санасына ата-бабаларымыздың қандай батыр болғандығын, олардың ел бостандығы жолындағы ерліктерін насихаттауымыз керек. Сонымен қатар, баға жетпес Тәуелсіздігімізді көздің қарашығындай сақтауды үйретуіміз тиіс – деп тұрғындарды мерейлі мерекелермен құттықтады.
Концерттік бағдарламаның басы Қазақ хандығының құрылуы жайлы көрініспен басталды. Көріністегі Керей мен Жәнібек хандардың сөзі көпшілікке рух беріп, еріксіз қол соқтырды. Сонымен қатар, жиылған жұртшылық бір сәтке болса да Қазақ хандығының құрылған кезіне сапар шегіп, тарихпен сусындады. Кәсіби болмаса да, өздерінің актерлік шеберліктерімен олардан кем түспеген мәдениет үйінің қызметкерлері қайназарлықтардың алғысына бөленді. Кейіннен Толқын Әлешұлы, Наурызбай Берікұлы, Айжан Тұрсынбай, Базарбек Сәтен, Шынар Әзімбаева «Алатау», «Қазақстаным алға», «Туған жер», «Ауыл сағынышы», «Жылқышы» сынды әуезді әндерімен көрерменнің құлақ құрышын қандырды. Ал «Бахар» би тобы мен Силима Ниязова мың бұралған биімен көпшілікке көтеріңкі көңіл-күй сыйлады. Концерт соңындағы «Достық» биі аудан аумағындағы ұлттар мен ұлыстар арасындағы өзара татулықты көрсетіп, бірлікті насихаттады.
– Биыл мерейлі даталардың тоғысқан жылы. Енді ғана тәй-тәй басқан еліміз үшін осы мерекелерді атап өтудің маңызы зор. Жыл басынан бері республика көлемінде, сондай-ақ, ауданымыздың түпкір-түпкірінде әртүрлі шаралар ұйымдастырылуда. Осы концерт сол игі шараның жалғасы.
Біздің мақсатымыз – ән айтып, би билеу емес. Тәуелсіздік бізге қандай жолмен келді, осы жолда құрбан болған батырларымыздың есімдерін жастардың санасына сіңіріп, оларды отансүйгіштікке тәрбиелеу – деп Қуат Байғожаев мерекелік шараға оң бағасын берді.
Сардарбек НҰРАДИН.