Алғаш комиссия мүшелерінің алдына Қаракемердегі Қ.Орымбетов атындағы орта мектептің 2001 жылғы Анас- тасия және 2006 жылғы Алена есімді оқушылары келді. Әдет-те айтқанымыздай, желөкпе сөзге желігіп от басқан, ақыры бала тағдырын балталаған қос бүлдіршіннің ата-анасының қылығын не дерсіз? Аналарының іздеуде жүргеніне де 3-4 жылдың жүзі болыпты. Әкесі болса, ішімдікке салынған. Заңды баласы екенін дәлелдейтін құжаты да жоқ қолында. Тіпті, тұратын үйлерін суреттеп жатудың өзі ауыр. Қуықтай бөлмелерді бүлдіршіндерден бөлек төрт адам паналайды екен. Оның екеуі жүйке жүйесі ауруына шалдыққандар. Бәрін айт та, бірін айт, бүлдіршіндер қауіпсіздігі үшін олар уақытша балалар үйіне жөнелтілді. Бұл турасында комиссия төрағасы Бекет Ахметов:
– Бәріміз де ата-анамыз. Ал бүлдіршіндеріміздің жағдайын жасау, балалық шағын жақсы өткізуге ықпал ету – әрбіріміздің міндетіміз. Ондай жағдай жасай алмады ма, мемлекет қамқорлығына алады. Тіпті, бұл азамат қазіргі уақытта заңды әкесі де емес. Сондықтан уақыт берейік. Бар құжатын заңдастырсын. Жағдай жасасын. Кейіннен қыздарын қайта ала алады, – деп ойын білдірді.
Екіншіден, Қ.Сәтпаев атындағы орта мектептің оқушысы А.Боданбай өз-өзіне қол салмақ болған. Себебін сұраса: «айналамдағылардың назарын өзіме аудартқым келді» деген. Осындай олқылық жіберген ата-ананы, мектеп ұжымын толық сын садағына ілді комиссия мүшелері. Байқағанымыз, жалғызбасты ана балалардың қамы үшін күн-түн демей жұмысқа жегілген екен. Қызымен сырласатындай мүмкіндігі де болмаған. Осы тұстан олқылық жібергенін мойындап, кемшіліктің орнын толтыруға уәде етті анасы. Ал мектеп ұжымы баланың бос уақытын сапалы өткізуде жіберген кемшілігі, оның жан күйзелісін ұғынбағаны үшін комиссия мүшелері алдында жауап берді. Сондай-ақ, ұжымдағы бірнеше мұғалімдер қатаң сөгіс алды.
Үшінші мәселе А.Жексембеков атындағы Түрген қазақ орта мектебіне тиесілі. Еліміз бойынша күн тәртібінен түспеген – бәз-баяғы әлімжеттік. Өзінің сыныптасын ұрған азамат комиссия алдында бұл заңсыз әрекетін түсіндірмек те болды:
– Жоғарғы сынып балалары бәрімізді жинап, ақша сұраған еді. Ал сол жиынға бұл сыныптастарым келмей қалды. Кейіннен екеуімен сөйлесуімді тапсырды, – деп ағынан жарылды бозбала. Енді бұл азамат аудандық тәртібі нашар балалардың тізіміне енді. Оның жай-жапсары туралы Бекет Төлегенұлы:
– Бұл тізімге енгендер тәртіп сақшыларының қатаң қадағалауында тұрады. Сол ауылда бұзақылықтар болса, бірінші Сіздерден жауап алады. Екіншіден, тәртібіңіз түзелмесе, кейін мемлекеттік қызметтерге жұмысқа орналаса алмайсыз. Сондықтан, ендігі уақытта әр қадамыңызды тек ата-анаңыз ғана емес, тәртіп сақшылары да бақылайтын болады, – деді.
Білім ошағында мұндай әлімжеттікке жол берген мектеп ұжымына да оңай соқпады. Жұмыстарында жіберген олқылықтары үшін тиісті мамандар жауапқа тартылды.
Жиын соңында комиссияның 2016 жылға арналған жұмыс жоспары бекітіліп, комиссия құрамындағы өзгерістер айтылды.
Қайнар ЖҰМАҒОЖА.