Жақында аудандық орталық мешітте облыстың бас имамы Нұржан Манапбаевтың қатысуымен жиын өтті. Оған аудандық ішкі саясат бөлімінің басшысы Момунжан Исламов, ұлттық қауіпсіздік комитетінің өкілдері, хазірет Рәтбек қажы Нысанбайұлы, ауданның бас имамы Сапархан Төреқұлов пен ауылдық мешіттердің имамдары қатысты.
Алғашқы болып сөз алған Нұржан Манапбаев жиылғандарға алғысын жеткізе келе:
– Құрметті имамдар, бүгінде асыл дінімізге күйе жағып, оны сырт көзге жеккөрінішті көрсеткісі келетіндер бар. Біз олардың алдын орап өтуіміз керек. Ол үшін ҚМДБ бекіткен мына төрт бағытта белсене жұмыс жасауымыз керек. Олар: уағыз-насихат, теріс ағымдармен күрес, қайырымдылық шаралары мен сауат ашу курсы. Ауылдық мешіттің имамдары кемінде 5-6 балаға сабақ беруі тиіс – деп, аталған бағыттар бойынша өткізілген шаралардың есебін аудандық орталық мешітке өткізуді тапсырды. Сондай-ақ, ішкі саясат бөлімінің басшысы Момунжан Исламов пен бөлімнің бас маманы Қайсар Асқарұлы, аудандық ұлттық қауіпсіздік комитетінің өкілдері ауыл имамдарына өздерінің тараптарынан ұсыныс-тілектерін айтып, бірлесе жұмыс атқаруға шақырды. Жиын барысында Рәтбек қажы өзінің өмірлік тәжірибесімен бөлісіп, имамдардың бүгінгі атқарып жатқан жұмысына көңілі толатындығын жеткізді.
Басқосу соңында Нұржан Манапбаев өздерінің белсенділігімен көзге түсіп жүрген бірқатар ауыл имамдарын алғыс хаттармен марапаттап, ризашылығын айтты.
Сардарбек НҰРАДИН.
