Райымбек батыр атындағы орта мектепте өткен дөңгелек үстел басында ашық әңгіме тиегі ағытылды. Аудан басшысы соңғы жылдардағы жеткен жетістіктер мен алдағы жоба-жоспарларды саралап өтті. Ондағы әйелдердің ерен еңбегін де астын сызып атады.
– Қандай жағдай болмасын, Сіздерсіз күніміз қараң. Әйел – анамыз. Ана – өмірдің гүлі, тіршілік басы. Әйел – әпке-қарындасымыз, әйел – қырмызы қызымыз. Бұл бұлжытпас өмір қағидасы жылдар желісімен жаңғырып келеді. Арулар шаңырақта ғана емес, қызметте де өзінің белсенділігін көрсетуде. Бүгінгі таңда ауданымызда білім саласында еңбек етіп отырған әйелдеріміз 80 пайыздан асады. Ал мемлекеттік қызметтегі әйелдер көрсеткіші де 50 пайыздың шамасында. Ең қиын сала құқық қорғау қызметінде де әйелдеріміздің үлесі 30 пайыздың үстіне шықты. Бұл дегеніміз гендерлік саясаттың жүйелі жүргізіліп жатқандығының айғағы. Өз қызметіне адалдығымен, тиянақтылығымен кез келген жауапты істерді иіріп әкететін әйелдер қашанда мемлекет үшін керек.
Кейіннен Бинәлі Әбдіқапасұлы өмір өткелдерінен алынған сан түрлі мысалдарды келтіре отырып, барша жиналған әйелдер қауымына ана болу, әже болу бақытын тіледі.
Ақжарма ойды аудан қыз-келіншектері атынан аудандық «Әйелдер одағы» қоғамдық қорының төрайымы Роза Исатаева, аудандық білім бөлімінің маманы Айжан Тортаева, ұзақ жылдар ауданда түрлі қызметтер тізгінін ұстап, бүгінде құрметті зейнет демалысына шыққан Зульфия Раджабова алғыстарымен жалғады. Есік гуманитарлық-экономикалық колледжінің директоры Гүлнар Жо-шыбаева ер азаматтар Отанның, отбасының тірегі екенін айғақтайтын әдемі өлеңін оқыды. Іші алтын, сырты күміс, айналасы жұп-жұмыр өлең жолдарына отырған қауым риясыз қошемет көрсетті.
Әдемі әңгіме желісі салтанатты шарамен жалғасты. Онда аудан басшысы барша әйелдерге Алғыс хат, гүл шоқтары мен сыйлықтарды табыс етті. Ал ауданның өсіп-өркендеуіне кезінде зор үлес қосқан Әде Есдәулетова кеудесіне «Еңбекшіқазақ ауданының құрметті азаматы» төсбелгісін тақты. Сәйкесінше, «Күміс алқа» төсбелгісі де өз иесін тапты.
Мерейлі күн келелі кездесумен басталып, ақ дастархан басында қорытындыланды.
Қайнар ЖҰМАҒОЖА.