Аудандық білім бөлімінің жылдық жоспарына сәйкес, Көктөбе ауылындағы «Айгөлек» балабақшасында аралас балабақшалар тәрбиеленушілерінің қатысуымен «Қазақшаң қалай, балақай?» атты аудандық байқау өтті. Бүлдіршіндердің еліне, мемлекеттік тілге сүйіспеншіліктерін арттыру мақсатында жүзеге асқан шараға аудандық білім бөлімінің бас маманы З.Бөлекбаева, аудандық мәдениет және тілдерді дамыту бөлімінің бас маманы Н.Бақбасарова, балабақша меңгерушілері қатысты. Алғашқы бөлім – таныстыруда «Болашақ-2007» балабақшасының тәрбиеленушісі Мария Якунина сөз саптауымен, тілге жүйріктігімен көзге түссе, екінші бөлім – өз өнерін көрсетуде «Айгөлек» балабақшасының тәрбиеленушісі Азиза Наманжанова М.Мақатаевтың «Үш бақытым» өлеңін ерекше тебіреніспен оқып, көрермен ықыласына бөленді. Үшінші бөлім – «Ертегілер еліне саяхат» деп аталды. Расымен де «Айгерім-1» балабақшасының тәрбиеленушісі Григорий Лабузов пен «Балдәурен» балабақшасының тәрбиеленушісі Диас Хамраев көпшілікті ертегілер еліне ерте білді. Сахналық қойылым жағынан да, киімдерімен де көңіл түпкірінен орын алды. Нәтижесінде, өзін-өзі еркін ұстауы, қазақ тілінде мүдірмей сөйлеуі, киімі жағынан бәрінен озық шыққан бес жасар Азиза Наманжанова бас жүлдені қанжығаға байлап, балабақшасының намысын көкке өрлетті. Барлық қатысқан бүлдіршіндер мақтау қағаздарымен және кішігірім сыйлықтармен марапатталып, олардың тәрбиешілеріне де алғыс хаттар табысталды.
Алмагүл НҰҒМАН.