2011 жылы Ават ауылдық округінің әкімі Ерғали Байбөриевтің қолдауымен ауылдық мәдениет үйінің директоры Долқунжан Розахуновтың ұйымдастыруымен құрылған «Бахар» ән-күй, би ансамблі осы уақыт аралығында өздерін биіктен көрсете білді. Облыстық, республикалық өнербәйгелерінде жүлделі орындарды иеленіп, облыс әкімінің Құрмет грамотасымен марапатталған. Құрамындағы 40-қа жуық өнерпаздың барлығы дерлік мектеп оқушылары. Сонымен қатар, барлығы Ават ауылының балғындары.
Наурыз айының 24-27 аралығында Астана қаласында ҚР Білім және ғылым министрлігінің қолдауымен талабы таудай таланттарға мол мүмкіндік беріп, балалардың бағын ашатын «Ақ көгершін» байқауы өтті. 1500-ге жуық балғындар қатысқан сайыста көршілес Ресей мен Қырғызстанның да өнерпаздары бақтарын сынады. Байқауда ауданымыздың үкілеген үміті «Бахар» ансамблі өздерінің дарынымен әділ-қазы алқаларының таңдайын қақтырды. Басқа өнер ұжымдарын шаң қаптырған жерлестеріміз жүлделі І орынды иеленіп, кубокпен оралды. Осыған орай, Ават ауылдық мәдениет үйінде өнер ұжымымен кездесу ұйымдастырылып, жұртшылық өнерлерін тамашалады. Шараның ашылуында аудандық ішкі саясат бөлімінің басшысы Момунжан Исламов пен Ерғали Байбөриев «Бахар» ән-күй, би ансамблінің балғындары мен жетекшілеріне алғыс хаттар табыс-тады. Шелек өңірінен келген ақсақалдар, қонақтар мен жігітбасылары ақ тілектерін арнап, өнер жолында толағай табыстар тіледі. Жиылған көпшілік дарынды балалардың әуелеткен әнін тыңдап, мың бұралған биіне тамсанды. Ал музыкалық аспапта орындаған композициясын жоғары бағалап, музыканттарды қошеметке бөледі.
– Тәуелсіз Қазақстанның көк Туын әлем сахнасында желбірету біздің өмірлік борышымыз. Ал еліміз өнер сайыстарының биігінен көрінсе – сол парыздың орындалғаны. Кешегі өткен «Ақ көгершін» байқауында шет елден келген қонақтар мен өнер адамдары ұжымның талантына тәнті болып, өз еліне қонаққа шақырды. Мұның өзі үлкен жетістік. Сондай-ақ, ансамбльдің хореографы Гүлмира Масимова мен музыкалық жетекшісі Абдусамат Василовтың еңбектерінің жемісі – дейді Долқунжан Розахунов.
Сардарбек НҰРАДИН.
