Жақында Білім және ғылым вице-министрі Елмира Суханбердиева Есік қаласындағы орталық мәдениет үйінде орта білім мазмұнын жаңарту бағдарламасы туралы түсінік берді. Оған аудан аумағындағы білім мекемелері басшыларынан бөлек Талғар, Ұйғыр, Панфилов, Райымбек аудандарынан да арнайы делегация ат басын тіреді. Келелі жиынды Алматы облысы білім басқармасының басшысы Ләззат Базарқұлова жүргізіп отырды.
Білім саласындағы жетістіктердің көрінісін бейнелеген көрмені тамашалаған вице-министр білім және ғылым жүйесіндегі тың серпінді жұмыстар жайлы кеңінен әңгіме қозғады:
– Білім және ғылым жүйесінде жұмыс 6 негізгі бөлім бойынша жүргізілетін болады. Бірінші, білім берудің инфрақұрылымын, бірінші кезекте ақпараттандыруды дамыту, екінші, үштілділікті дамыту, үшінші, 12 жылдық оқытуға кезең-кезеңмен көшу, төртінші жекеменшік және мемлекеттік секторлар үшін бірдей жағдай жасау, бесінші, білім беру ұйымдарының қаржы-шаруашылық қызметінің ашықтығын қамтамасыз ету, қаржы дербестігі арттырылған ашық бухгалтерия құру және алтыншы, ғылымды қоса қаржыландыру қағидаларына көшу. Бұл бағыттар бойынша жүйелі жоспарлар да құрылды. Оны әрбір ұстаз, ел ертеңін тәрбиелейтін тұлға білуі керек, – деді.
Сондай-ақ, жиын барысында білім саласындағы оқу бағдарламасына енгізілетін өзгерістер туралы сұрақтар қойылып, Елмира Амангелдіқызы жауабын берді.
Қайнар ЖҰМАҒОЖА.
