Жастар – жарқын болашақ кепілі. Елбасы Н.Ә.Назарбаев Жолдауында: «Мен сіздер, бүгінгі жастар, ерекше ұрпақ екендеріңізді қайталаудан жалықпаймын. Сіздер тәуелсіз Қазақстанда өмірге келдіңіздер және сонда ержетіп келесіздер. Сіздердің жастық шақтарыңыздың уақыты – біздің еліміздің көтерілу және гүлдену уақыты. Сіздер осы жетістіктер рухын және табысқа деген ұмтылушылықты бойларыңызға сіңірдіңіздер» – деп, жастарға сенім білдірген болатын. Елбасының сенімі ақталып, бүгінгінің жастары тек білімге ұмтылып, еліміздің дамуына өз үлестерін қосуда. Жақында Талдықорған қаласында облыс аумағындағы осындай белсенді жастардың басын қосқан жиын өтті.
Облыс орталығының Жастарға қызмет көрсету орталығында өткен шараға Алматы облысы әкімінің орынбасары Жақсылық Омар арнайы қатысты. Жиын барысында облыс жастарының жыл бойы атқарылған жұмыстары мен жетістіктері тізбектеліп, келер жылға бағдар беріліп, жоспарлар құрылды. Облыстағы жастар ісі жөніндегі әдіскер-нұсқаушылардан басым түскен Жаңашар ауылдық округінің жастар ісі жөніндегі әдіскер-нұсқаушысы Мадия Болатқызы Қазақстан Респуб-ликасы Тәуелсіздігіне 25 жыл толуына орай, өңірдегі жастар саясатын жүзеге асыруда, жастардың бойында отаншылдық, іскерлік, жауапкершілік қасиеттерін қалыптастыра отырып, рухани өркендеуге қосқан үлесі үшін облыс әкімі орынбасарының Алғыс хатымен марапатталып, Алматы облысы бойынша «Ең үздік жастар ісі жөніндегі әдіскер-нұсқаушысы» атанды. Жаңа жыл қарсаңында жаңа жетістіктерге жеткен Мадия Болатқызын жүлдесімен құттықтап, үздік нұсқаушының жаңа жылдық лебізін білген болатынбыз.
Алдымен жастардың қоғамдағы орнын сөз еткен ол ауданымызда жастарға жасалып жатқан жақсылықтарды шолып өтті.
– Мешін жылы жастар үшін де, халық үшін де өте табысты әрі жаңалыққа толы жыл болды. Мешін жылында ел келешегі болған балаларға арналып қаншама балабақша мен мектептер салынып, күрделі жөндеуден өтті. Сонымен қатар, қаншама жыл қараусыз қалған саябағымыз күрделі жөндеуден өтіп, жастардың игілігіне берілуде. Түрлі бағдарламалардың арқасында мыңдаған жастарымыз жұмысқа орналасып, еңбектерінің жемісін көруде. Мемлекет бізге барлық жағдай жасауда. Біздің мақсатымыз – сапалы білім алып, өзімізге қамқорлық көрсеткен елімізге адал қызмет ету – дейді. Сондай-ақ, жаңа тауық жылынан жақсылықтар күтеміз деп қол қусырмай, сол жақсылықтарды өзіміз жасауымыз керектігін айтты. Осы жылы елімізде өтетін халықаралық маңызы бар шаралардыың жоғары дәрежеде өтуіне жастардың өз үлесін қосуы міндетті екендігін жеткізді. Мереке қарсаңында аудан жастарын жаңа жылмен құттықтаған облыстағы үздік нұсқаушының тауық жылы табысты боларына сенімі мол.
Сардарбек НҰРАДИН.
