Ғылыми жаңалық пен технологияны өндіріспен байланыс-тыруды тапсырған Тұңғыш Президентіміз индустриалды-инновациялық дамуды көздеген еді. Кәсіпкерлік, өндіріс пен ауылшаруашылығы саласына инновацияны енгізу үшін алдымен білікті мамандар, заман талабына сай ІТ технология бойынша білім алған жастар қажет. «Тәрбиені тал бесіктен» бастау керектігін ескерген ел үкіметі орта мектептерде тегін ІТ сыныптары мен робототехника кабинеттерін ашып, болашақтың мамандарын мектептен бастап даярлауға кірісті.
«Біз цифрлық технологияны қолдану арқылы құрылатын жаңа индустрияларды өркендетуге тиіспіз. Бұл – маңызды кешенді міндет. Елде 3D принтинг онлайн-сауда, мобильді банкинг, цифрлық қызмет көрсету секілді денсаулық сақтау, білім беру ісінде қолданылатын және басқа да перспективалы салаларды дамыту керек. Бұл индустриялар қазірдің өзінде дамыған елдердің экономикаларының құрылымын өзгертіп, дәстүрлі салаларға жаңа сапа дарытты – деген еді Елбасы Жолдауында. Расында, дамыған елдегідей біздегі барлық салаларды толықтай цифрландырып, көлеңкелі экономиканы түбегейлі жою үшін сол саланы жетік меңгерген маман әзірлеуіміз қажет. Осы орайда, «Nur Otan» партиясының бастамасымен Қазақстанның түпкір-түпкірінде ІТ сыныптары ашылып, балаларға заман талабына сай білім беру қолға алынған болатын. Аталған жақсылықтар ауданымызды да айналып өтпеді. 2018 жылы облыстық мәслихат депутаты Жангелді Осанның демеушілігімен №1 Шелек орта мектебінде ІТ және робототехника сыныбы ашылып, шелектік оқушылардың төбесі көкке жеткен еді. Жалпы құны 5,5 млн теңге болатын ІТ сыныбында балалардың ақыл-ойын дамытуға арналған түрлі құрастырғыш роботтар мен компьютерлер орналасқан. Қазіргі кезде оқушылар қарапайым үлгідегі роботтарды құрастыруды, роботтарды басқару бағдарламасын және 3D принтинг құрылғысы арқылы макеттерді құрастырып, құжаттарды цифрландыру жұмысын үйренген. «Робототехника негіздері» атты авторлық бағдарлама бойынша 5-6 сыныптар арасында таңдау сабақтары жүргізіледі. Балаларға білікті де білімді мамандар сабақ беріп, талаптарын шыңдауда. Оқытушылары Эльмира Уркумбаева «Рухани жаңғыру» бағдарламасы аясында өткізілген облыстық «Үздік қосымша білім беру педагогы-2018» байқауына қатысып алғыс хатпен марапатталған. Сонымен қатар, облыстық «Үздік информатика пәнінің мұғалімі» сырттай байқауында «Робототехника» таңдау сабағынан панорамалық сабақ көрсетіп, ІІІ дәрежелі дипломға ие болды.
Саяжай маңындаңы №1 Рахат орта мектебіндегі заманауи үлгіде жабдықталған ІТ және робототехника сыныбы биылғы жылдың наурыз айында ашылды. Бұл сыныпты жабдықтап, арнайы компьютерлік бағдарламаларды орнату үшін бюджеттен 9,5 млн теңге жұмсалған.
Мектептегі робототехника үйірмесін информатика пәні мұғалімдері Нұрлан Изимбетов пен Еркінай Исаханова жүргізеді. Қазіргі таңда аталған үйірмеге 60 оқушы қатысады. Болашақта олардың санын 2 есеге арттыру көзделуде.
Бүгінгі күні оқушылар түр-лі жобаларды жоспарлап, оны дамытуды, роботтарды құрастыруды, «ARDUINO», «Stem» ойын комплексін әзірлеуді, 3D объектлерін модельдеуді, Anime Studio бағдарламаларымен жұмыс жасауды меңгерген. Нәтижесінде, 5,6 сынып оқушылары Сарбиназ Жарылқасын, Дәулет Махамбетияр, Малика Болат, Әлібек Омарғазы 3D қаламмен жұмыс жасау, 3D модельдеу бойынша өздерінің алғашқы жобалық жұмыстарын «Балапан» республикалық телеарнасының «Ай балапан» бағдарламасында қорғаған. Аталған үйірмедегі оқушылар қарапайым үлгідегі роботтарды, роботтарды басқару бағдарламасын меңгеріп, 3D принтинг құрылғысы арқылы макеттер құрастырып, құжаттарды цифрландыру жұмысымен айналысуда.
Келер күндердің көкжиегін тек білім, жарқын жаңалық қана нұрландыра алмақ. Сондай жаңалықтардың бірі, «Алғашқы әскери және техно-логиялық дайындық» пәніне «Әскери роботты техника негіздері» бөлімінің енгізілуі. Пәннің базалық мазмұнында IT-технологияны пайдалану қарастырылған. Білім алушылар роботтарға арналған тапсырмалар, роботтардың атқара алатын қызметтері, жекелеген тактикалық міндеттерді шешу: жергілікті жерлерді бағдарлау, роботтардың қиын жағдайларда қызмет ету бағдарламаларын толық меңгеретін болады.
Ауданымыздағы білім беру ісіне енгізілген инновациялық жаңалықтар бүгінде оқушылар-дың білімін арттырып, заманауи технологияларды меңгеруге септігін тигізуде. «Nur Otan» партиясы аудандық филиалының берген мәліметіне сүйенсек, жағымды жаңалықтар мұнымен толастаған жоқ. Жыл соңына дейін тағы екі ІТ және робототехника сыныбын ашу жоспарланып отыр. Ол үшін бюджеттен 19 млн теңге бөлінген. Жыл соңына дейін 2 мектептің оқушылары заман талабына сай жасақталған ІТ сыныбына кірмек.
Сәт сайын ақпараттық технология жетіліп, цифрлық жүйе қарыштап дамыған сайын бұл саладағы бәсекелестік те арта түспек. Ал, жақын келешекте ІТ мамандардың көмегінсіз бірде-бір жұмыстың тындырылмасы сөзсіз. Ашылғанына жылдың көлемі болса да, жас робототехник мамандардың жетістіктері жетерлік. Бірі робот құрастырса, енді бірі түрлі анимациялық бағдарламалармен жұмыс жасайды, 3D қаламмен суреттер салады. Демек, болашаққа салған инвестиция сенімді ақтап, цифрлы келешектің іргетасы қалануда.
Сардарбек НҰРАДИН.
