6 қаңтарда ауданымызға ҚР Парламенті Мәжілісінің депутаты Зағипа Балиева іс-сапармен келіп, Шелектегі бірқатар нысандарды аралады. Мәжілісменді аудан әкімі Бинәлі Ысқақ бастап жүрді. Аудан әкімінің бірінші орынбасары Айбек Бидаев, «NurOtan» партиясы аудандық филиалы төрағасының бірінші орынбасары Қуат Байғоджаев та кездесулерге қатысты.

Зағипа Яхьянқызы алдымен облыстық мамандандырылған сәбилер үйіне ат басын бұрып, ондағы жұмыстардың жай-күйімен танысты. Бүгінде онда небәрі 9 бала тәрбиеленеді. Әлбетте, балбөбектерге мемлекет тарапынан жасалып жатқан жағдай көңілден шығады. Бұл турасында кеңінен әңгіме құрған халық қалаулысы күрделі жөндеу жүріп жатқан Шелектегі орталық аурухананың да құрылыс жұмыстарын көзімен көрді. Құрылыс сапасын жіті бақылауда ұстауды тапсырды. Бұл турасында: – Аурухана алаңын абаттандыруға қаражаттың бөлінуін жылдамдату керек. Сонымен қатар аурухананың материалдық базасын жаңартуға қаражаттың бөлінуіне барынша қолұшын беремін – деді З.Балиева.

Кейіннен Шелектің орталық базарына арнайы барып, ондағы тұрғындармен жүздесті. Медициналық сақтандыруға уақытылы қаражаттың құйылып отыруын ескертті. – Өздеріңіз білесіздер, қазір күн санап өзгерістер орын алуда. Соның бірі – медициналық сақтандыру. Бұл дегеніміз – ертеңгі Сіздердің денсаулықтарыңыздың кепілі. Ал оны уақытылы құймасаңыздар, емделуге мүмкіндіктеріңіз болмайды, – дей келе ондағы қараша халық сұрақтарына жауап берді.

Ауданда жаңа ғимарат салуды арман еткен 17 мектеп бар. Соның бірі – Сарыбұлақ орта мектебі. 1937 жылы салынған бұл типтік емес білім ошағына жаңа ғимарат керек-ақ. Арнайы барып зерделеген Зағипа Яхьянқызы бұл мәселені жіті бақылап, барынша қолдау көрсететінін жеткізді.