Қазақстан Республикасының Президенті Қасым-Жомарт Тоқаевтың «Абай және ХХІ ғасырдағы Қазақстан» атты көлемді мақаласынан кейін туындаған алғашқы ой тек тақырыбының өзі бұл жариялымның мазмұнын меңзеп, бағыт-бағдарын анықтап тұрғанын көреміз. Өмір деген - ескінің тозып, жаңаның озып тұрған үздіксіз үдеріс, тоқтаусыз қозғалыс екенін ескере отырып, сол ескіде де есті дүниелер бар екенін ұмытпауымыз керек-ақ! Ғасырдан астам бұрын хакім Абай қазағын қатты сынай тұрып, үлкен жанашырлықпен «Ғылым таппай мақтанба» деп білімге, оқуға, озық ойға, саналы өмірге жетеледі емес пе?!
Бүгінгі күнге арнап айтқандай, «Пайда ойлама, ар ойла, талап қыл артық білуге» деген Абай сөздері. Прагматизм деген бір кезеңдегі ұстанымды желеулетіп, жалаулатып, пайдаға көп назар аударып, қоғамдвқ моральді белінен басып кеткен де азаматтар кездесіп жатқаны шындық.
«Өзіңе сен, өзіңді алып шығар, еңбегің мен ақылың екі жақтап», – деді ұлы ақын Абай. Бүгінгі күннің ең басты ұраны десек, жаңылмаспыз. «Жоқ, жоқ» дей берсең, жоқ көбейе береді деген еді дана бабаларымыз. Сол «жоқтарды» айта бермей, «бар» қылатын жол іздеуді меңзеді қазақтың ұлы ақыны.
Абайды оқи отырып, ұлы ғұламаның, ағартушы ақынымыздың терең ойлы шығармаларын зерттеп, зерделеп қана қоймай, бүгінгі қым-қуыт заманымызда басшылыққа ала отырып, өмірімізде пайдалана білуге шақырады мақаласында Президент Қасым-Жомарт Тоқаев.
Хайролла Ахметжанов,
Қазақстанның Құрметті журналисі