Осындай келелі кездесуді ұйымдастырып, колледж шәкірттерімен лекция-концерт өткізуге ұйытқы болған – көп жылдан бері колледжде музыка пәнінің оқытушысы болып қызмет етіп жүрген Базаркүл Камрадинова екенін айтпасқа болмас. Расымен де, Ағайша Шермұхамбетқызы әр сөзі, әр қимылы, әрбір сырнайымен салған әнімен бейне бір сабақ беріп отырғандай керемет әсерде қалдық. Баршамыз қосылып ән шырқап та кеттік. Алғаш Алматыда «Айгүл» ансамблі қалай құрылғанын еске алып, Е.Хасанғалиевтің жетекшілігімен бірнеше концерттерге қатысқандары жайлы да айтып берді. Ш.Қалдаяқов, Н.Тілендиевпен болған жүздесулерін, әсіресе, Елбасы Н.Назарбаевпен қалай тілдескенін зор тебіреніспен көрерменге жария етті.
«Шәкіртсіз ұстаз – тұл» демекші, өзімен ерте келген шәкірттеріне кезек беріп, әнші қыздар ұстазының сүйемелдеуімен әуезді әнге салды.
Кеш соңында сөз алған колледж директоры Г.Жошыбаева Ағайша Исағұловаға алғыс білдіріп, өнеріне өрлеу тіледі.
Алмагүл НҰҒМАН.