Ақын Мұқағали Мақатаев жырлағандай, таныс өлке, таныс аймақ, таныс маңда балалық шағын өткерген туған жерден артық жер бар ма? Наурыз мейрамы – жаңа жылмен бірге Сарыбұлақ ауылының тұрғындары ел Тәуелсіздігінің 25 жылдығын да бірге атап, «Туған жерге тағзым» деген игі шара өткізді. Ауыл болып атап өткен бұл қуаныш тойында Қаражота селолық округінің әкімі Ерік Рахымбаев ел тәуелсіздігін алғалы бергі жақсылық пен жетістіктер жайлы толғана әңгімелесе, ауылдың Ноянбай, Әбдуәли сынды ақсақалдары ынтымақ бар жерде ырыс-құт бірге жүретінін, Елбасы Н.Назарбаевтың салиқалы саясатының арқасында Қазақ елін әлем танығанын жастарға үлгі етті. Ал, ақынжанды ардақты ана Емелхан Қайыпова бұл қуанышқа жырдан шашу шашты. Ауылдың ақ жаулықты Күміс, Бипай сынды апайлары Османқұлдың Кененге арнаған әнін, «Кәрілік» термесін тебірентсе, кимешекті келіндері мың бұрала би биледі. Ауыл тұрғындарынан құралған шағын оркестр «Туған жер» атты сазды әуенді сан аспаппен үйлестіре орындаса, Медетақын Қадырбай «Туған жер туралы» толғауын арнады. Мектеп оқушылары мен мұғалімдері де құлақтан кіріп, бойды алар әндерді әуелете орындап, түрлі ұлт билерінде мың бұралды.
Қуанышқа арнайы шақырылған Шелек мәдениет үйінің қызметкері Қалбүбі Сқақова қонақкәдеге тамылжыта ән салды. Осы игі шараны ұйымдастырған Сарыбұлақ ауылдық мәдениет үйінің директоры Қарлығаш Қосалиева кешті қорытындылап, ауыл болып «Қаражорға» биін билеп, ұлыстың ұлы күніне арналған наурыз көжеден дәм татысып, думандатып тарасты.
Анарбек БЕРДІБАЕВ.