Шараға Ұлттық Қауіпсіздік комитеті аудандық бөлімінің өкілдері, аудан әкімінің бірінші орынбасары Н.Құдайбергенов, аудандық ішкі істер басқармасының басшысы Бағдат Әшімов, 6654 әскери бөлімінің командирі К.Қуатов, аудандық емхана бас дәрігерінің орынбасары Д.Айтжанов, төтенше жағдай және азаматтық қорғаныс бөлімінің басшысы Т.Сәбитов, Рахат ауылдық округінің әкімі Ахмет Жолдыбаев, сәулет және қала құрылысы бөлімінің өкілдері қатысты. Алдымен бес қаруын сайлаған әскери бөлімнің сарбаздары саяжайды қоршауға алды. Кейіннен, тәртіп сақшылары үй-үйді аралап, тексеріс жүргізді. Сондай-ақ, саяжай аумағына кіріп-шыққан көліктер мен адамдар да жіті бақылаудан өтті. Осылайша, құқық қорғау органдарының терроризмге қарсы дайындығы тексерілді. Оқу-жаттығу жетекшісі Ұлттық Қауіпсіздік комитеті өкілдерінің айтуынша, мекемелердің дайындықтары ойдағыдай. Тек, кейбір олқылықтарды түзеу керек. Ол туралы тиісті органдарға ескерту берілді.
Құрметті аудан тұрғындары! Сақтықта қорлық жоқ. Аудан аумағында Ұлттық Қауіпсіздік комитеті әлі де терроризмге қарсы оқу-жаттығу жұмыстарының жүргізілетіндігін ескертеді. Дүрлікпей, түсіністікпен қараңыздар.
Сондай-ақ, күдікті ұйымдар мен адамдар, ғимараттарда күдік туғызатын сөмкелер мен қораптарды байқасаңыздар мына сенім телефондарына хабарласа аласыздар: 102, 7-21-05.
Сардарбек НҰРАДИН.