Көзмоншақ көлі, тұп-тұнық Түргендей белі, қонақжай елі, шыбық ексең тал өскен жері бар Еңбекшіқазақ ауданы туризмді дамытудың қайнары-ақ. Әйткенмен, сан соғудың қажеті жоқ, уақыт ырғағымен бұл сала да дамуға бет алған. Дәлел десеңіз айтайық, осы жылдың тоғыз айының өзінде 75 729 турист ауданға ат басын бұрған. Сәйкесінше, 106,3 млн теңгеге ақылы қызмет көрсетілген. Бұл туралы блог-турда белгілі болды.
Елбасының «Рухани жаңғыру» бағдарламасы аясында жүзеге асқан шарада аудандық ішкі саясат бөлімінің басшысы Момунжан Исламов, «Еңбекшіқазақ» газетінің бас редакторы Хайролла Ахметжанов, ардагер журналист Мұрат Нақатаев және бірнеше БАҚ өкілдері болды. Мақсат айқын: ауданымыздың киелі жерлерін көпшілікке насихаттау, туризмді дамытуға ықпал ету.
Алдымен журналистер Республикалық «Алтын адам» археологиялық мұражайын аралады. Оларды арнайы аудан делегаттары күтіп алып, қазба жұмыстары жүргізіліп жатқан өңірге апарды. Онда музей директоры Тасқын Тойбаев қазба жұмыстарының жай-жапсарын әңгімелеп берді.
Кейіннен бір топ тілшілер қауымы Есік көліне жол тарты. Кеңес үкіметі тұсында туристердің ерекше ықыласына бөленген көзмоншағымызға 1963 жылғы қайғылы оқиғадан кейін келушілер саябырлаған. Ауданның тізгінін Алханбек Мәлкеев ұстаған тұста көлге дейін жол салынып, теңіз деңгейінен 1700 метр биіктікте тұрған Іле Алатауының көзмоншағына жан бітті. Көл тарихын жан-жақты Хайролла Ахметжанов және Мұрат Нақатаев әңгімелеп берді тілшілер қауымына.
Қазір көлдің жан жағында арнайы автотұрақ, жалға берілетін шатырлар келушілерге жұмыс істеуде. Тұмса табиғатты көремін десеңіз, Есік көлі есігін айқара ашып тұр.
Түс ауа журналистер Түргендегі кіші сарқырамаға бет алды. Аюсай деп аталған сарқырама 50 метр биіктіктен құлай аққан. Тас жолдан 1300 метр тау жағалай жүріп жеткен журналистер мұндағы сұлулыққа тамсанбай қоймады. Құлай аққан судың гүрілі құлақ тұндырады. Арыны қатты су екпіні түскен жеріндегі тастарды ойып, мүжіп, кішігірім көлдің пайда болуына жағдай жасаған. Күннің ыстықтығына қарамастан ондағы су мұздай. Осынау табиғат тылсымдарына қаныққан тілшілер қауымы естелік суретке тоқтаусыз түсіп жатты...
Бүгінде ауданда туризмді дамыту бойынша кешенді жоспарлар жүзеге асуда. Ол турасында аудандық кәсіпкерлік бөлімінің басшысы Нұрболат Серғали әңгімелейді: – Ауданда табиғи қорықтар мен мұражайлар және археологиялық ескерткіштерді аралатудан бөлек туристерді қызықтыратын ауданда басқа да нысандар қызмет көрсетеді. Ауданда барлығы 12 туристік бағыт бойынша туристер қабылдануда. Ауданда туристерді орнықтыруға арналған нысандар жеткіліксіз болғандықтан, олардың санын көбейту мақсатында инвесторларды тартуда бірқатар жұмыстар жүргізілуде. Атап айтсам, «Ескене» ЖШС «Батыс Еуропа-Батыс Қытай» республикалық тас жолының бойында ауданға келген туристерді және жол жүрушілерді қабылдауға арналған заманауи, стандартқа сай жол бойындағы қызмет көрсету кешенін салу жобасы облыстық комиссиядан инвестициялық жоба ретінде оң шешім алып, бүгінгі таңда сұралған жерінің құжаттары рәсімделуде. Жоба құны 600 млн теңгені құрайды, – дейді.
– Бүгінгі блог-турдың маңызы зор. Бұлай дейтініміз, ішкі туризмді дамыту – аудан әкімі Бинәлі Ысқақтың күн тәртібінде тұрған мәселе. Екіншіден, Елбасының «Рухани жаңғыру» бағдар-ламасы шеңберінде іргелі өңіріміздегі киелі жерлерді насихаттау – журналистер құзырындағы іс. Осы ретте аудан әкімдігі қолдау білдіріп, «Мәңгілік Ел тұғыры» қоғамдық қоры ұйытқы болып отырған кездесудің жемісін көреміз деген ниеттеміз. Әрине, бүгінгі аралаған жерлеріңіз біздің ауданның киелі де көркем нысандарының оннан бір бөлігі десек артық айтқандық емес. Ауданымыздағы 79 елді мекеннің әрбірінің киесі бар, мақтанып, марқайып көрсететін құндылықтары да жетерлік. Алдағы уақытта әрбірін жеке-жеке көрсетеміз, елге танытамыз. Бұл аудан әкімінің тікелей қамқорлығында тұрған жайт, – деді аудандық ішкі саясат бөлімінің басшысы Момунжан Исламов журналистерге берген сұхбатында.
Қайнар ЖҰМАҒОЖА.
