Жақында Түрген ауылындағы А.Жексембеков атындағы қазақ орта мектебінде «Тәуелсіз Ел тірегі – білімді ұрпақ» атты Жексембеков Абыхан Аманбайұлын еске алуға арналған республикалық ғылыми-практикалық конференция өтті.
1 ақпан дәл осы Түрген ауылындағы алғашқы қазақ мектебінің ашылуына тікелей мұрындық болған тұлға Абыхан Аманбайұлының туған күні. Осыған орай, аталған конференция Абыхан Жексембеков турасында кеңінен әңгімелеу және есімі берілген мектеп оқушыларының және ұстаздар қауымының бүгінгі жетістіктерін саралау мақсатында ұйымдастырылды. Оған аудандық мәслихат хатшысы Бекет Ахметов қатысып сөз сөйлесе, аудан әкімінің орынбасары Мақсат Бекетаев, «Нұр Отан» партиясы аудандық филиалы төрағасының бірінші орынбасары Қуат Байғожаев, аудандық «Еңбекшіқазақ» газетінің бас редакторы Хайролла Ахметжанов құрметті қонақтар қатарында төрден орын алды, Нұр-Сұлтан және Алматы қалаларынан арнайы келген Әл-Фараби атындағы Қазақ Ұлттық университетінің профессоры, педагогика ғылымдарының докторы Шәркүл Таубаева, Алматы облысы бойынша педагогика қызметкерлерінің біліктілігін арттыру орталығының директоры Толқын Әуелғазина, Нұр-Сұлтан қаласы әкімдігінің № 74 мектеп-гимназиясының директоры Жеңіскүл Нүсіпжан баяндамалар оқып конференция ажарын аша түсті. Абыхан Аманбайұлының еңбегі мен өмір жолы турасында естелікер айтылумен қатар «Мұғалімнің инновациялық мәдениеті», «Өмірі өнегемен өрнектелген өр тұлға» тақырып-тарында оқылған баяндамалар ұстаздар мен мектеп оқушылары және қонақтар үшін тың ізденістер ұсынды. «Қала мен ауыл мектебінің тәжірибе алмасуы» тақырыбында оқылған баяндама аясында А.Жексембеков атындағы мектеп директоры Гүлбақыт Қасымжанова және Нұр-Сұлтан қаласы әкімдігінің № 74 мектеп-гимназиясының директоры Жеңіскүл Нүсіпжан өзара ғылыми-әдістемелік тәжірибе алмасу мақсатында екі жақты меморандумға қол қойды. Сонымен қатар, мектеп оқушылары ұсынған концерттік бағдарлама көпшілікке көтеріңкі көңіл-күй сыйлады.
Әке жайындағы әсерлі естеліктерімен бөліскен Абыхан Жексембековтың қыздары Венера және Мәншүк Жексембековалар мектептің бүгінгі таңда еліміздің ең алдыңғы мектептері қатарына енуі үшін жан-жақты қолдау білдіретіндіктерін жеткізді. Атап өтсек, мектеп қабырғасында 600-ге тарта оқушы білім алса, оларға 58 мұғалім дәріс беруде. Барлығы да ЖОО-ны тәмамдаған білікті мамандар. Сонымен қатар, әр жылы дәстүрлі түрде ақпан айының 1-жұлдызында Абыхан Аманбайұлын еске алу мақсатында түрлі іс-шаралар ұйымдастырылып, жыл бойына мектеп ұжымымен атқарылған істерге сараптау, талдау жұмыстары жүргізіліп отырады.
Әділет САРЫБАЙ
