Құрметті ұлағат иелері ұстаздар!

Бүгінде жас ұрпаққа сапалы білім, саналы тәрбие беру мемлекеттік саясаттың басым тұсы. Себебі, болашақ елдің іргесін бүгінгі тәрбиелі, білімді жас буын қалайды. Осы ретте Елбасымыз Н.Назарбаев: «Болашақта еңбек етіп, өмір сүретіндер – бүгінгі мектеп оқушылары, мұғалім оларды қалай тәрбиелесе, Қазақстан сол деңгейде болады. Сондықтан ұстазға жүктелетін міндет ауыр» дегені ойымызға оралады.

Ақиқаты сол, Сіздердің арқалаған жүктеріңіз ауыр. Осыған сай мемлекет тарапынан да қолдау зор екені шындық. Мемлекет басшысы Қасым-Жомарт Кемелұлы «Мұғалімнің еңбегін лайықты бағалау – өте маңызды» – деп, ұстаздардың жалақысын 4 жылда 2 есеге көтеруді тапсырды.

Ауданымызда да мұғалімдерге деген қамқорлық ерекше. Аудан бюджетінің 70 пайызға жуығы осы білім саласын дамытуға бөлінуде. Өскелең ұрпақтың алаңсыз ілім ізденуіне жол ашу мақсатында мектептердің материалдық-техникалық жағдайын жақсартуда ауқымды жұмыстар атқарылып отыр. Жүйелі жұмысымыз одан әрі жалғаспақ.

Шындығы, білім жүйесінің жаны да, жүрегі де, тірегі де – ұстаз. Ал оларға көрсетілетін құрмет-қошемет ешқашан аласармайды. Кәсіби мерекелеріңізбен шын жүректен құттықтай отырып қиын да жауапты еңбектеріңізге табыс тілеймін. Отбасыларыңыз аман, елдің мерейін асыратын шәкірттеріңіз көп болғай.