Өз  шығармашылығымен халықты  тәнті етіп, жергілікті оқушыларды бейнелеу өнеріне үйретіп жүрген талантты суретшілердің бірі – Көкен Минал.

1989 жылы Моңғолияның  Налайық  қаласында  дүниеге келіп, 1 жасында отбасы тарихи отанына, яғни Қазақстанға қоныс аударған. Бірінші сыныпқа 1997 жылы Еңбекшіқазақ ауданының Рахат ауылында орналасқан орта мектептің табалдырығын аттайды. Мектеп қабырғасында Көкен өзінің көркемдік дарынын, талантын көрсетті. Мектепті бітіргеннен кейін жас жігіт Абай атындағы Қазақ ұлттық педагогикалық университетіне оқуға түсіп, өнер, мәдениет және спорт институтын «Бейнелеу өнері және сызу» мамандығы бойынша үздік бітіреді. Көкен үнемі түрлі фестивальдарға, көрмелерге қатысып, жүлделі орындарға ие болған. Өзі бейнелеу  мен сызу пәндерінен сабақ беретін Рахат ауылының мектеп оқушылары да үнемі байқаулардан жетістіктерге жетеді. Суретшінің жұбайы Дана Байжұманова да суретші  және Өрікті ауылында орналасқан Б.Майлин атындағы орта мектептің  бейнелеу мен сызу пәндерінің мұғалімі болып қызмет атқарады. Олардың бір жасар қыздары да сурет салуды ұнатады. Әкесі оның жетістіктерін мақтан тұтады және ол атақты суретші болатынына сенімді. Көкен Минал бокспен айналысуды өзінің хоббиі деп санайды, сонымен қатар, футбол ойнайды және осы командалық ойынға жас ұрпақты үйретеді. Оның ең басты  мақсаттарының бірі – Қазақстан Суретшілер Одағының мүшесі болу.

Раушан Сабазова.