Аталмыш бағдарлама аясында Павлодар облысы жұмысқа шақырады. Бұл туралы арнайы келген Ақсу қаласы әкімінің орынбасары Балтабай Қаппасов Шелек ауылы тұрғындарымен кездесуінде айтты. Мұндағы мақсат – өңірдегі кадр тапшылығын жою.

Шараға ауыл тұрғындары қатысып, сауалдарын қойды. Нәтижесінде, бір отбасы «Еңбек» бағдарламасымен қоныс аударуға ниет білдіргенін жеткізді. Мұндағы шарт біреу: Қазақстан азаматы, әрі жоғары білімді маман болуы.

– Павлодар облысы, Ақсу қаласы және оның ауылдық округтеріне денсаулық сақтау саласының мамандары, оның ішінде медициналық оңалту дәрігері, дәрігер-офтальмолог, учаскелік дәрігер терапевт, онколог дәрігер, эндокринолог дәрігер, мейіргер керек. Сондай-ақ, білім беру саласының ағылшын тілі пәнінің, орыс тілі пәнінің, математика пәнімен бастауыш сынып мұғалімдері тапшы. Осы тізімді ауылшаруашылығына керекті мамандармен толықтыруға болады. Олар механизатор, ветеринарлық дәрігер, зоотехник, камаз жүргізушісі қажет, – дейді Б.Қаппасов.

Жалпы, Ақсу – республиканың ең ірі өндірістік қалаларының бірі, мұнда ферроқорытпа, электр қуаты өндіріліп, плас-тикалық құбырлар шығарылады. Павлодар облысының орталығында, Ертістің сол жағалауында орналасқан қала.

Әлбетте, қоныс аударған азаматтарға мемлекет қолдауы орасан. Ол турасында: – Бағдарлама аясында Павлодар өңіріне қоныс аударғандар жұмыспен қамтылып, оларға 80 шаршы метрге дейінгі көлемде баспана беріледі. 5 жылдан соң үй жекеменшікке аударылады. Оған дейін тұрғын үй коммуналдық төлемдерін өтеп отырса жеткілікті. Айта өтейік, қоныс аудару кезінде мемлекет тарапынан 97 мың теңге бір реттік жәрдемақы төленеді, – деді Балтабай Маданиұлы.

Бұл мақсатта биыл «Еңбек» мемлекеттік бағдарламасы шеңберінде Ақсу қаласында және Үштерек, Қызылжар ауылдарында оңтүстік және Алматы мен Нұр-Сұлтан қалаларынан бағдарлама шеңберінде қоныс аударып келетін мамандарға арнайы 18 екі пәтерлі тұрғын үй салынған.

Ілия СҰЛТАН