1699 жылы Таутүрген ауылында дүниеге келіп, қалмақтың атақты батыры Зонаны жекпе-жекте жеңген батыр ӘжібайНайманбайұлы ерлігі тарихтан белгілі. «Ақтабан шұбырынды, Алқакөл сұлама» заманында жауларға жерін таптатпаған, дұшпанға қадам аттатпаған есіл ердің ерлігі ұрпаққа аңыз. Биыл батыр бабамыздың 320 жылдығына орай ұрпақтары Әжібай тоғанының жанынан белгітас орнатты. Жуырда салтанатты ашылуы өтті.

Салтанатты шарада «НұрОтан» партиясы аудандық филиал төрағасының бірінші орынбасары Қуат Байғоджаев, округ әкімі Бота Елеусізова, батыр баба ұрпақтары сөз сөйлеп, тарихтан тәбәрік ұсынды. Батыр бабаның бүгінгі бейбіт заман жолында жанкешті ерліктерін сөз етті. Аласапыран кезеңдерде елдігімізді қолдан бермей, жанқиярлықпен қан төккен сәттерін нақты дәлелдер арқылы баяндады.

Сонымен белгітастың орнатылуына екі айға жуық уақыт кеткен. Әжібай батыр ұрпақтары Құдайберген Ақынов, Сұраншы Бекменов, Отыншы Татибаков, Қанат Ескелдиев, Әділжан Исенбаев, Кеңесбай Ұшбайұлы және Шапай Баяндыұлы игі іске бас болған. Ұрпақтары қолдап, 4 млн теңгеге жуық қаражатқаТаутүргенге бұрылған тұсқа белгітас орнатылған. Ашылуынан кейін Әжібай батыр рухына құран оқылып, ас берілді. Сондай-ақ, волейболдан турнир ұйымдастырылып, түс ауа көкпар тарту ойынына жалғасты.  

Өз тілшіміз.