Сыйлық алу ғана емес, сыйлау да адамдардың көңіл күйін көтеріп, ерекше сезімге бөлейді. Ендеше, «Берсең, балаға бер» демекші, балалар үшін сыйлықтардың ең үздігі не? Осы жайында айтсақ...

Сіз ойлағандай, балалар үшін ең қымбат, керемет сыйлық ешкімде жоқ ойыншық көлік те, әдемі көйлегі бар үлкен қуыршақ та емес! Бүгінгінің балаларында мұндайлардың түр-түрі бар және оларды ойыншықпен таңғалдыра, айтарлықтай қуанта да алмайсыз. Есесіне, балалар төмендегілерге зәру және сізден тек соны күтеді!

• Бірер минут уақыт тауып, балаңызды тізеңізге отырғызып, оның бүгінгі күні қалай өткенін сұраңыз. Өзіңіз де қызық оқиғаларыңызбен бөлісіңіз.
• Балаға демеу көрсетіп, оны әрдайым алға талпындырып отырудың маңызы мол. Ата-анасының «Қолыңнан келеді, сен мықтысың!» деген сөздері бала үшін кез келген сыйлықтан да қымбат, әрі бағалы.
• Екі жаста, мейлі, жиырма жаста болсын, бала үшін әке-шешенің махаббаты мен жылуы бөлек. Қыз бой жетіп, ұл ер жетіп, ересектер қатарына қосылғанымен, олар әрдайым ата-ананың махаббатын аңсайды. Сондықтан балаларыңызды құшағыңызға алып, аналық, әкелік махаббатыңызды сездіру, еркелетіп, беттерінен сүю ешқашан кеш те, ерсі де емес.
• Бірге отырып тамақтану да өте маңызды. Балаңызды дастархан басында жалғыз қалдырып кетсеңіз, пісірген тағамыңыз қандай дәмді болмасын, оның дәмі отбасымен бірге отырып жеген қара нандай болмайтынын ескеріңіз.
• Тәртіп пен тәрбие де – ата-ананың балаларына жасаған үлкен сыйларының бірі. Тәрбие көріп, тәртіппен өскен баланың болашағы зор болмақ.
• Ештеңе істемеген адам ғана еш қателеспейтінін ескеріңіздер. Сондықтан балаларыңызға өз қателіктерінен сабақ алуына мүмкіндік беріңіздер
• Балаларыңыздың айналасындағыларды танығысы, білгісі келіп қоятын сұрақтарын ешқашан жауапсыз қалдырмаңыздар.
• Әрдайым балаңыздың қабілетін байқап, оны дамытуына жағдай жасап, қолдау көрсетіңіздер.
• Балаңыз оны сағынатындарыңызды, күтетіндеріңізді, іздейтіндеріңізді, ол үшін уайымдайтындарыңызды, оның қамқоршысы, тілеушісі екендеріңізді біліп өссін.
• Балаларыңыз сіздерге – әке-шешесіне қарап өсетінін естен шығармаңыздар. Демек, олардың болашағының іргетасы да – сіздер. Сондықтан қамқор әке, үлгілі шеше, мықты отбасы болу – балаларыңызға жасайтын ең үлкен сыйлықтарыңыз болмақ.

Дайындаған: Құралай МҰРАТҚЫЗЫ