Демалыс күні Есік қаласындағы спорт сарайында аудан әкімінің жүлдесіне арналған қазақ күресінен «Еңбекшіқазақ бөрісі»  турнирі өтті.

Аталған күрес додасына ауданымыздың 15-ке жуық ауылдық округінен балуандар қатысып, өзара мықтыны анықтады. «Күш атасын танымас» дегендей, боз кілімде бақ сынаған балуандар кіл мықтының арасынан кім мықтыны анықтады. Жарысқа түскен қазақ күресінің хас шеберлері арасынан І орын рахаттық Нұрғали Жолтаевқа бұйырып, «Еңбекшіқазақ бөрісі» атанды. ІІ орынға қырбалтабайлық Ерсін Хамза жайғасып, Есік қаласының балуаны Ерлан Әлімжан ІІІ орынға  ие болды. Жүлделі орынға ие болған спортшылар аудан әкімінің дипломымен, қаржылай сыйлықтармен марапатталды.

І және ІІ орынға ие болған балуандар Нұрғали Жолтаев пен Ерсін Хамза облыстық «Алматы облысының бөрісі» жарысына жолдама алды. Олар аудан атынан Қонаев қаласында өтетен облыстық додада күш сынайтын болады. Аманбек Фазылов сынды спорт ардагерлері жүлделі балуандарды жеңісімен құттықтады. Жеңімпаздарды марапаттаған облыстық дене шынықтыру және спорт басқармасының олимпиадалық спорт түрлері және спорттық резервтер бөлімінің басшысы Ерболат Сарабеков балуандарға сәттілік тіледі.  

Е.АСЫЛ.