Жақында Қорам батыр ауылындағы спорт залда Тәуелсіздіктің 30 жылдығына орай Қорам орта мектебіне еңбегі сіңген ұлағатты ұстаз Нұрғожа Керімқұлов атындағы аудандық турнир өтті.

Байрақты бәсекеге аудандық дене шынықтыру және спорт бөлімінің басшысы Ерболат Сарабеков, округ әкімі Тұрсын Еменбаев және ауданда үстел теннисімен шұғылданып жүрген ардагерлер мен жастар қатысты. Ерболат Сарабеков пен Тұрсын Еменбаев сөз сөйлеп, қатысушы-ларға сәттілік тіледі. Сайыстың табысты өтуіне осы жолдардың авторы батасын берді.

Жарысқа шықырылған қонақтар арасында Серік Әлжамағатов, Амангелді Сағатов, Исатай Қиялов, Юнусжан Даутов, Пазылжан Мамиров, Мәлік Шебеков, Дүйсенғали Масирбаев, Бекен Искаков, Ақан Қасқабасов, Мади Утемисов өз пікірлерін ортаға салып, шараны жоғары дәрежеде ұйымдастырған округ әкімдігінің спорт жөніндегі әдіс-кері Дулат Тоқаевқа ризашылығын білдірді.

Барлық санитралық талаптарды сақтай отырып, залдағы төрт үстелде 16 команда өз бақтарын сынады. Тартысты өткен жарыста қарсыластарға дес бермеген Түрген ауылдық округінің теннисшілері І орынға ие болды. ІІ орынға Түрген ауылдық округінің екінші командасы жайғасты. ІІІ орын қорамдықтарға бұйырды. Жеңімпаздар бағалы сыйлықтармен, дипломмен және кубокпен марапатталды.

Спорттық сайыс барысында ерекше ойын үлгісімен көзге түскен Алтынбек Омаров, Ермек Мәсірбаев және Айтолқын Саясат жанкүйерлеріне қуаныш сыйлады.

Шара соңында дүниеден озған ардагер спортшыларға арнап құран оқылып, ас берілді.

Тоқтасын ТҰЯҚОВ,

ауданның құрметті азаматы, ардагер спортшы