Тоғызқұмалақтан еліміздің жастарын жаттықтырып, ұлттық ойынымызды дәріптеп жүрген Мусрят Елибакиевке ҚР Мәдениет және спорт министрлігі спорт және шынықтыру істері комитетінің төрағасы С.Сапиевтің бұйрығымен тоғызқұмалақтан халықаралық дәрежедегі спорт шебері атағы берілді.
Өмірін спортқа арнаған Мусрят Елибакиев алғаш 1992 жылы чемпион атанған. Содан бері ұлттық ойыны-мыздың дамуына өз үлесін қосып жүрген спортшы мүмкіндігі шектеулі балаларға тоғызқұмалақ үйретіп келеді. Еңбегі еленген азаматтың куәлігін спорт күні қарсаңында аудандық дене шынықтыру және спорт бөлімінің басшысы Ерболат Сарабеков табыстады.
– Бұл көп жылдық маңдай терімнің жемісі деп білемін. Мұндай жоғары дәрежедегі атаққа қол жеткізу мен үшін үлкен құрмет, мәртебе, – дейді М.Елибакиев. Бүгінде спортшы зағип жандар спорты голболды елімізде дамытуға күш салуда. Қазіргі таңда осы спорт түрінен ұлттық құраманың бас бапкері.
Айта кетейік, Мусрят Елибакиев тоғызқұмалақтан Алматы облысындағы, Республика бойынша мүмкіндігі шектеулі жандар арасындағы алғашқы халықаралық дәрежедегі спорт шебері.
mezet.org
