Таутүрген ауылындағы негізгі орта мектепте ҰОС-ның арадагері,  1945 жылы Москвадағы Қызыл алаңдағы Ұлы жеңіс парадына қатысып, мотоциклмен  өткен  жалғыз қазақ  майдангері, Қазақ КСР оқу ісінің үздігі, ауданымыздың Құрметті  азаматы  Сәрсен Әбдіхалықовтың туғанына 100 жыл толуына арналған спорттық іс-шара өтті.

ҰОС-ның ардагері Сәрсен Әбдіхалықов Таутүрген ауылында қырық жыл ұстаздық қызмет атқарып, ұжымшардағы еңбеккерлердің, малшылардың балаларын оқытты. Таутүрген мектебінде жиырма бес жылдай мектеп директоры болып, оның материалдық-техникалық базасын нығайтуға көп еңбек сіңіріпті. Тіпті, 1965 жылы Таутүрген ауылында қазіргі екі қабаттан тұратын мектептің бой көтеруіне тікелей мұрындық болыпты. Міне жарты ғасырдан астам уақыт өткенде өзі қабырғасын қалаған білім ордасында ардагер ұстазды еске алу шарасы өтіп отыр. Аталған спорттық шараға Түрген ауылдық округіндегі Д.Қонаев атындығы, М.Ломоносов атындағы және  Таутүрген негізгі орта мектебінің оқушылары шағын футбол  және туристік кедергілдерден өту бойынша сайысқа түссе, аталған мектеп мұғалімдері жағажай волейболынан бақ сынады. Жарысқа қатысушылар көпке тартысты ойын көрсетуге, бар қарым-қабілетін әйгілеуге тырысты. Жарыс  қорытындысы бойынша, Д.Қонаев атындығы орта мектеп оқушылары І орынды, М.Ломоносов атындағы ІІ орынды, ал Таутүрген негізгі орта мектебі ІІІ орынды иеленді. Додада топ жарғандар арнайы медальдармен марапатталып, еске алу турнирінің кубогі Д.Қонаев атындығы орта мектепке табысталды.

Спорттық бәсекеден кейін Сәрсен Әбдіхалықов рухына бағышталып құран оқылып, ас берілді. Ардагердің көзін көргендер ол кісінің  адамгершілік асыл қасиетін сөз етісті. Халықаралық «Алаш» әдеби сыйлығының лауреаты, «Мұқағали» журналының бас редакторы  Батық Мәжит өмірге келгеніне ғасыр толған тұлғаның өнегелі істеріне тоқталды:

– Ол кісі Таутүргеннің тау тұлғасы  бола білді. Ғұмыр бойы өзінің туған топырағына игілікті іс атқарды. Бүгінгі жас ұрпақ ардагердің елеулі еңбегін әсте ұмытпауы керек, – деді қаламгер. Шара соңында ардагердің ұлы, белгілі журналист Марат Әбдіхалықов еске алу турнирін ұйымдастырған Таутүрген  негізгі орта мектебінің ұжымы мен қатысушыларға алғыс айтты.

Е.АСЫЛ.