Есік қаласында Алматы облысынан шыққан тұңғыш КСРО спорт шебері, Қазақстан Республикасына еңбек сіңірген жаттықтырушы Станислав Тынысбековтің жүлдесі үшін бокстан 2007-2008 жылы туылған жасөспірімдер арасында республикалық дәстүрлі турнир өтті.

Байрақты бәсекеге еліміздің түпкір-түкпірінен 200-ден астам боксшы қатысты. Турнирдің салтанатты ашылу рәсіміне отандық бокстың ардақты ардагерлері, ережесіз жекпе-жектен әлем чемпионаттарының жеңімпазы, Ұлттық жекпе-жек федерациясының президенті Сабыржан Махметов, ережесіз жекпе-жектен әлем кубогінің иегері Елмұрат Қайыпжанов, өзге де елге танымал спорт саңлақтары қатысты. Қызыл бұрыш пен көк бұрышта арнайы спорт киімдерімен бұлшық еттері шиыршық атқан түрлі салмақтағы жасөспірімдер барлық шеберліктерін салып сайысты. Қарсыластар аянбады. Бокс қолғабын қанша жұмсақ дегенмен, негізінен жеңіл жарақат ретінде көбінің мұрындары қанады, бірі жеңді, бірі жеңілді. Жарыс қортындысы бойынша, командалық есепте Еңбекшіқазақ ауданы І, Алматы қаласы ІІ, ал Жетісу облысы ІІІ орынға тұрақтады. Соңында жүлдегерлер арнайы сыйлықтармен, медальдармен марапатталды.

Е.АСЫЛ.