Азат орта мектебінде аталған ауылдың 100 жылдығына орай елді мекен жастарының ұйымдастыруымен еркін күрестен кіші жасөспірімдер арасында өңіраралық турнир өтті.

Аталған турнирдің ашылу салтанатына Сидней Олимпиадасының күміс жүлдегері Ислам Байрамуков, Қазақстан Республикасының еңбек сіңірген жаттықтырушысы Олег Ушанов, еркін күрестен екі дүркін Азия чемпионы Азамат Дәулетбеков, республикалық ұйғыр этномәдени орталығының басшысы Долқунтай Абдухалил, Рахат ауылдық округінің  әкімі Қайсар Богусбаев пен спортшылар қатысты.

Турнирге екі жүздей кіші жасөспірімдер санаты бойынша облыс аймақтарынан келген балалар қатысты.

– Спорт – ел мерейін асырып, абыройын асқақ етер сала. Саламатты өмір салтын ұстану – рухтың күштілігі, ұлт денсаулығының берік кепілі. Бүгінгі Азат ауылының 100 жылдық мерейтойына арналған турнирге еліміздің әр өңірінен бақ сынауға келген барша балуандарға сәттілік тілеймін, – деді округ әкімі Қайсар Богусбаев.

Әр аймақтың мықтылары жиналған боз кілемдегі белдесуде ауданның балғын балуандары да намысты қолдан бермеуге тырысты.

Жарыс қорытындысы бойынша командалық есепте I орынды Қарасай ауданы, II орынды Алматы қаласы иеленді. Ал ауданымыздың командасы үздік үштікті түйіндеді. Жарыс жеңімпаздары мақтау қағаздары және медальдармен марапатталды.

– Осындай спорт түрлері көрермендерге көптеп жол тартса, ауданымыздың спорт саласында жасындай жарқылдаған жас балуандардың ұлттық құрама сапында бой көрсетіп, қарасы қалыңдай түсетініне сенім білдіремін. Өйткені әлемдік деңгейдегі жарыстарда шыңдалатын  болады, – дейді олимпиада ойындарының күміс жүлдегері Ислам Байрамуков.

Е.АСЫЛ.