Мәлік Нәдірбеков Қаратұрық ауылдық округіне қарасты Достық ауылының тумасы. Ол – КСРО-ның спорт шебері, Қазақстан Республикасының еңбек сіңірген жаттықтырушысы. Мәлік ел біріншілігінде бес рет үздік шыққан, ауыл жастары арасында Одақ чемпионы атанған. Ол әйгілі балуан әрі жаттықтырушы ретінде өзін жақсы қырынан таныта білген, еркін күрестен Қазақстан спорты тарихының есімдері алтын әріппен жазылған балуандардың ішіндегі бірі әрі бірегейі. Мәлік Нәдірбеков еркін күрестен Қазақстан ұлттық құрама командасының тізгінін ұстап, қаншама білекті балуандарды тәрбиелеп шыққан білікті бапкер. Оның ел спорты үшін еңбегі еленбей қалған жоқ. Еркін күрестен КСРО кезінде боз кілемнің төрінде, Одақта қазақтың абройын асқақтатқан балуандардың қатарында аты ерекше аталады.
Міне, осындай ерен еңбегі-мен мәртебесі биік Мәлік Нәдір-бековтің жүлдесіне арналған еркін күрестен 2011, 2012 және 2013 жылдары туған жасөспірім ұлдар мен қыздар арасында облыстық турнир өтті. Жаңа пайдалануға берілген Шелек дене шынықтыру-сауықтыру кешенінде алғаш рет өткізілген бұл жарысқа Қонаев қаласының, Алматы қаласының, Жетісу облысының, Райымбек, Жамбыл, Қарасай, Іле, Талғар, Ұйғыр, Еңбекшіқазақ аудандарынан 200-дей жас балуан қатысты. 14 салмақ бойынша ұлдар, 6 салмақ бойынша қыздар өзара бақ сынасты.
Жарыстың ашылу салтанатына облыстық спорт басқармасының басшысы Ерболат Сарабеков, аудандық №2 балалар мен жасөспірімдер спорт мектебінің директоры Елмұрат Қайыпжанов, КСРО спорт шеберлері атанған ардагер балуандар Рыскелді Жақабаев, Дәулетбек Тілеужанов, Шелек ауылдық округі әкімінің орынбасары Қуат Абдакимов сөз сөйледі. Мәртебелі Мәлік пен жұбайына шапан жауып, мерейін өсірсе, балуан тарапынан да келген қонақтарға сый-сияпаттар жасалды.
Екі күнге созылған жарыс-та ұлдар арасынан Жамбыл ауданының «Үшқоңыр» командасы жеңімпаз атанды. Еңбекшіқазақ ауданының «Тұран» командасы ІІ орынды, ал Шелек ауылы №2 БЖСМ-і ІІІ орынды иеленді. Сондай-ақ қыздар арасынан Еңбекшіқазақ ауданының командасы жеңімпаз атанды. Ал ІІ орынды Қонаев қаласының, ІІІ орынды Жамбыл ауданының «Үшқоңыр» командасы бөлісті. Жеңімпаздар мен жүлдегер-лерге арнайы медальдар мен алғыс хаттар, сыйлықтар табыс етілді. Команда бойынша жеңімпаз, жүлдегерлерге кубок табысталды.
Анарбек БЕРДІБАЕВ.
